दुधामध्ये होणारी भेसळ रोखण्यासाठी अन्न आणि औषध प्रशासनाने नुकत्याच केलेल्या कारवाईत अवघ्या आठ तासांत २,७९६ लीटर सदोष दूध परत पाठवले. प्रशासनाने शहरातील पाचही जकातनाक्यांवर ‘जकातनाका दूध मोहीम’ राबवण्यात आली. त्यात १२७ वाहनांमधील सुमारे साडेचार लाख लीटर दुधाचा दर्जा तपासण्यात आला आणि त्यापैकी दोन वाहनांतील २,७९६ लीटर दूध सदोष आढळल्याने ते परत पाठवण्यात आले.
मुंबईत लाखो लीटर दुधाची विक्री होते. त्यात भेसळ होत असल्याच्या घटना तक्रारींद्वारे वारंवार समोर आल्या आहेत. त्यामुळे अन्न आणि औषध प्रशासनाच्या मुंबई विभागाच्या पथकाने २० जानेवारी रोजी ही मोहीम हाती घेतली होती.
यापुढेही कारवाई विभागातर्फे यापुढेही भेसळखोरांवर वचक ठेवण्याचे काम केले जाणार आहे. त्याचप्रमाणे भेसळयुक्त दुधाच्या पुरवठ्यावर कारवाई केली जाणार असल्याचे स्पष्ट करण्यात आले आहे.
दहिसर, मानखुर्द, ऐरोली, मुलुंड एलबीएस, मुलुंड पूर्व जकात नाका अशा पाच ठिकाणी तपासणी करण्यात आली. त्यापैकी आठ दुधाचे नमुने तपासणीसाठी प्रशासनाच्या प्रयोगशाळेत रवाना करण्यात आले आहेत. त्याचा अहवाल हाती आल्यावर कारवाई केली जाईल.