जीएसटी लागू झाल्यानंतर पहिल्यांदाच जीएसटी विभागाने छापेमारी करत कोट्यवधी रुपयांचं घबाड जप्त केलं आहे. जीएसटी विभागाने अंगाडिया कामगारांवर ( सामानाची ने-आण करणारे) धाड मारली असून त्यांच्याकडून ९४ कोटींचा मुद्देमाल जप्त करण्यात आला आहे. शुद्ध हिरे, सोन्याची बिस्किटे, ज्वेलरी आणि रोख रक्कम आदी मुद्देमाल या धाडीत पकडण्यात आला आहे. त्यामुळे हिरे व्यापाऱ्यांचे धाबे दणाणले आहेत.
काही अंगाडिया कामगारांचे गुजरातहून मुंबईला आणलेले ८५ कुरियर्स ५ जानेवारीला जीएसटी विभागाने ताब्यात घेतले. आंगडिया कामगारांकडे या पार्सलशी संबंधित कागदपत्रे नसल्याने हे कुरियर्स ताब्यात घेण्यात आले होते. त्यात ६९ कोटींचे हिरे, १६ कोटींचे सोन्या-चांदीचे दागिने आणि तीन कोटींच्या सोन्याच्या बिस्किटांचा समावेश आहे. त्याचबरोबर ४ कोटी रुपये रोख रक्कम आणि ६० लाखाच्या परदेशी नोटा जप्त करण्यात आल्या आहेत. दरम्यान, जप्त करण्यात आलेले सोन्याचे बिस्किट तस्करीचा भाग आहेत की परदेशातून आणलेले आहेत, याचा जीएसटी विभाग आणि आयकर विभाग शोध घेत आहे.
‘गुजरातहून आलेले ८५ कुरियर जप्त करण्यात आले. त्यात ९० बॅगांचा समावेश आहे. या बॅगांमध्ये १०४२ बड्या रकमेचे पार्सल होते. त्यातील केवळ २०० पार्सलधारकांकडेच जीएसटीशी संबंधित कागदपत्रे होती. तर ८४२ पार्सलधारकांकडे कागदपत्रेच नव्हती. त्यामुळे या पार्सलची चौकशी करण्यात येत आहे,’ असं जीएसटी आयुक्त के. एन. राघवन यांनी सांगितलं. तर ‘हे प्रकरण टॅक्सशी संबंधित नाही. तर पेपरवर्कशी संबंधित आहे. आवश्यक कागदपत्रे नसल्याने जीएसटी अधिकाऱ्यांनी पार्सल जप्त केले आहे. आम्ही कागदपत्रे दिल्यानंतर पार्सल सोडवून घेऊ,’ असं हिरे व्यापारी नरेश मेहता यांनी सांगितलं.