केजरीवाल यांच्यावर महिलेकडून शाईफेक

छत्रसाल स्टेडियम येथे आयोजित कार्यक्रमात केजरीवाल उपस्थित नागरिकांसमोर आभार व्यक्त करत असताना एक महिला चपळाईने व्यासपीठाकडे धावली आणि भाषण करण्यासाठी उभे असलेल्या केजरीवाल यांच्या दिशेने शाई फेकली. त्यातील काही थेंब मुख्यमंत्र्यांच्या तोंडावर उडाले. एका गैरव्यवहाराचा मोठ्याने उल्लेख करत या महिलेने काही कागदपत्रेही व्यासपीठावर फेकली.

सुरक्षारक्षकांनी तातडीने मुख्यमंत्र्यांभोवती कडे उभारले, तर त्यातील काही जण त्या महिलेला अडविण्यासाठी धावले. तिला जाऊ द्या, सोडा तिला. दिल्लीत काहीतरी चांगले घडत असताना हे काय घडत आहे, असे म्हणत केजरीवाल यांनी सुरक्षारक्षकांना रोखण्याचा प्रयत्न केला. त्यानंतर दिल्ली पोलिस त्या महिलेला तेथून बाजूला घेऊन गेले. केजरीवाल यांनी आपले भाषण थोडक्‍यात संपविले आणि कार्यक्रम संपला.