राष्ट्रवादी काँग्रेसचे अध्यक्ष शरद पवार यांनी पक्षाच्या अध्यक्षपदावरुन निवृत्त होण्याचा निर्णय जाहीर केला. शरद पवारांच्या निर्णयानंतर राष्ट्रवादी काँग्रेसचे नेते आणि कार्यकर्त्यांना मोठा धक्का बसला. राष्ट्रवादीच्या नेत्यांनी शरद पवारांना निर्णय मागं घेण्याची विनंती केली मात्र ते त्यांच्या निर्णयावर ठाम असल्याची माहिती समोर येत आहे. शरद पवारांनी कार्यकर्त्यांना दोन दिवस विचार करुन निर्णय घेऊन कळवतो, असं म्हटलं होतं. राष्ट्रवादी काँग्रेसचं अध्यक्षपद २४ वर्ष भूषवल्यानंतर शरद पवार यांनी निवृत्त होण्याचा निर्णय जाहीर केला असून ते त्यांच्या निर्णयावर ठाम असल्याची चर्चा सुरु आहे. त्यामुळं राष्ट्रीय अध्यक्षपदावर दोन नावांची चर्चा सुरु आहे. बारामतीच्या खासदार सुप्रिया सुळे आणि पक्षाचे राष्ट्रीय उपाध्यक्ष प्रफुल पटेल यांची नावं चर्चेत आहेत.
सुप्रिया सुळे आणि प्रफुल पटेल राष्ट्रवादी काँग्रेसच्या राष्ट्रीय राजकारणात कार्यरत आहेत. प्रफुल पटेल सध्या पक्षाच्या उपाध्यक्ष पदावर आहेत. महाराष्ट्रासह राष्ट्रवादी काँग्रेस केरळ, नागालँड, लक्षद्वीप, झारखंड, मध्यप्रदेशमध्ये थोड्या फार प्रमाणात कार्यरत आहे. त्यामुळं राष्ट्रीय राजकारणात कार्यरत असलेल्या नेत्याकडे पक्षाची धुरा सोपवली जाईल अशी चर्चा आहे. यामध्ये खासदार सुप्रिया सुळे आणि प्रफुल पटेल यांची नावं आघाडीवर आहेत.
अजित पवार यांनी दोन दिवसांपूर्वी पुण्यातील कार्यक्रमानंतर पत्रकारांशी संवाद साधला होता. पुण्यातील पत्रकारांनी अजित पवारांना कर्नाटकला प्रचाराला का असं विचारलं होतं. यासंदर्भात बोलताना मी तिथला स्टार प्रचारक नाही, मी माझा महाराष्ट्र सोडणार नाही, मी सहा महिने दिल्लीला जाऊन बघितलं, मला दिल्ली मानवली नाही. मला आपला महाराष्ट्र आणि महाराष्ट्रातील जनता पटते,असं वक्तव्य अजित पवार यांनी केलं होतं. त्यामुळं राष्ट्रवादी काँग्रेसची महाराष्ट्रातील जबाबदारी अजित पवारांकडे जाण्याचे संकेत आहेत.
राष्ट्रवादी काँग्रेसच्या नेते कार्यकर्त्यांनी जरी शरद पवारांनी निर्णय मागं घ्यावा, असं म्हटलं असलं तरी ते त्यांच्या निर्णयावर ठाम असल्याच्या चर्चा आहेत. पुढील दोन दिवसात राष्ट्रवादी काँग्रेस आणि पर्यायानं महाराष्ट्राच्या राजकारणात काय घडामोडी घडतात याकडे सर्वाचं लक्ष आहे.