अंधश्रद्धेच्या नावाखाली सव्वीस वर्षीय उच्चशिक्षित सुनेचा छळ सुरू असल्याचा प्रकार समोर आला आहे. काळे कपडे घातल्याने तुला मुल होणार नाही, अनैसर्गिक कृत्य करणे, विरोध केल्यास मारहाण करून मानसिक त्रास दिल्याप्रकरणी पतीसह सासरच्यांविरोधात लोणी काळभोर पोलिस ठाण्यात गुन्हा दाखल करण्यात आला आहे.
पती प्रतीक शरद गिरमे (वय ३०), सासरे शरद कृष्णाजी गिरमे (वय ७१), सासू सुरेखा शरद गिरमे (वय ६५), दीर पंकज शरद गिरमे (वय ३२) आणि जाऊ निखिता पंकज गिरमे (वय २९, सर्व रा. मॉर्निंग ड्यू सोसायटी, शेवाळवाडी रस्ता, मांजरी बुद्रुक) अशी गुन्हा दाखल करण्यात आलेल्यांची नावे असल्याचे लोणी काळभोर पोलिस ठाण्याचे वरिष्ठ निरीक्षक राजेंद्र मोकाशी यांनी सांगितले. महिलेची सासुरवाडी हडपसर परिसरात असल्याने गुन्हा हडपसरकडे वर्ग करण्यात आला आहे.
पोलिसांनी दिलेल्या माहितीनुसार, प्रतीक गिरमे आणि त्याची पत्नी उच्चशिक्षित आहे. प्रतीक आणि त्याचे आई, वडील, भाऊ, वाहिनी एका धार्मिक संस्थेशी संबंधित आहेत. त्यामुळे ते सतत त्यांच्या सुनेला अंधश्रद्धेच्या नावाखाली त्रास देत होते. ‘काळे कपडे घालू नये, काळे कपडे घातल्यास मूल होत नाही, माताजींनी दिलेले कुंकू लावण्यास भाग पाडणे, कुंकू पुसलेले दिसल्यास शिवीगाळ करून मानसिक त्रास देणे,’ असा प्रकार सुरू होता; तसेच विवाह झाल्यापासून पती पीडितेवर पॉर्न व्हिडिओ दाखवून अनैसर्गिक कृत्य करीत होता. सहकार्य न केल्यास मारहाण करीत होता. पीडिता र्भवती असताना किरकोळ कारणावरून पतीने लाथाबुक्यांनी मारहाण केली होती. यामुळे गर्भपात करावा लागला असल्याचेही फिर्यादीत म्हटले आहे.
या प्रकरणी लोणी काळभोर पोलिस ठाण्यात पती, सासू, सासरे, दीर आणि जाऊ यांच्या विरोधात कौटुंबिक हिंसाचार, अंधश्रद्धा आणि पतीच्या विरोधात अनैसर्गिक कृत्य केल्याप्रकरणी बलात्काराचा गुन्हा दाखल करण्यात आला आहे. पुढील तपास हडपसर पोलिस करीत आहेत.