एका महिलेला लग्नाचे आमिष दाखवून तिच्यावर अत्याचार केल्याप्रकरणी काशिमिरा पोलिस ठाण्यात भाजप पदाधिकाऱ्याविरोधात बुधवारी गुन्हा दाखल करण्यात आला आहे. पीडित महिलेने दिलेल्या तक्रारीनुसार, मागील वर्षभरापासून तिच्यावर अत्याचार केले जात होते.
काशिमिरा पोलिस ठाण्यात २५ वर्षीय पीडितेने दाखल केलेल्या तक्रारीत तिने म्हटले आहे की, भाजपचे पदाधिकारी नवीन सिंग याच्यासोबत सन २०२१मध्ये फेसबुकवर तिची ओळख झाली. पतीसोबत वाद होत असल्याने लहान मुलींसोबत आपण वेगळे राहत असल्याचे पीडितेने सिंग यांना सांगितले होते. त्यावर आपल्याला नोकरी देतो असे सांगून सिंग यांनी मिरा रोडमध्ये एक खोलीही भाड्याने दिली होती. नगरसेवक पदाची निवडणूक आपण लढणार असल्याने, त्यानंतर आपण लग्न करू, असे आमिष दाखवत सिंग याने आपल्यासोबत शारीरिक संबंध ठेवले, असेही पीडितेने तक्रारीत म्हटले आहे.दरम्यान, मधल्या काळात पीडित गर्भवतीदेखील होती. मात्र सिंग याच्या सांगण्यावरून तिने गर्भपात केला होता. सिंग यांनी पीडितेला शिवीगाळ करत तिचे खासगी फोटो परिचित व्यक्तीला पाठवून बदनामी करण्याची धमकी दिली होती. यामुळे त्रस्त झालेल्या पीडित महिलेने अखेर काशिमिरा पोलिस ठाण्यात तक्रार केली होती. त्यावरून बलात्कारासह विविध कलमांतर्गत काशिमिरा पोलिसांनी सिंग याच्याविरोधात गुन्हा दाखल केला आहे.