मिठाई व्यावसायिक मनिष मेघराज चौधरी (वय २३ रा. गंगापूररोड) यांनी गंगापूर पोलिसांत, तर रतन पुनाजी चौधरी (वय ४० रा. लवाटेनगर) यांनी सरकारवाडा पोलिसांत संशयिताविरुद्ध फिर्याद दिली आहे. या दोन्ही व्यावसायिकांनी संघटनेच्या पदाधिकाऱ्यांसह मंगळवारी पोलिस आयुक्त जयंत नाईकनवरे यांची भेट घेत त्यांना घडलेला प्रकार सांगितला. त्यानुसार रात्री उशिराने दोन्ही पोलिस स्थानकात गुन्हे दाखल करण्यात आले आहेत.
अशी झाली उकल
संशयिताने सावरकर नगरातील मिठाई दुकानात खंडणी मागितली. यावेळी व्यावसायिकाने इतर मिठाई विक्रेत्यांशी चर्चा केली. तेव्हा, नुकतेच कॉलेजरोड परिसरात हा प्रकार घडल्याचे समजले. तेव्हा व्यावसायिकांनी दुकानांचे सीसीटीव्ही तपासले. यावेळी दोन्ही ठिकाणी धमकावणारी व्यक्ती एकच असल्याचे समजले. कॉलेजरोड परिसरातील मिठाई दुकानामागे असलेल्या एका खासगी कार्यालयात हा संशयित सतत कामानिमित्त येतो. तेथे आल्यावर या दुकानातून फास्टफूड खातो. यामुळे व्यावसायिकाशी त्याची तोंडओळख होती. शिवाय त्याने व्यावसायिकास फोनवरुन अजय ठाकूर असे नाव सांगितले होते.
कोण आहे ठाकूर?
संशयिताचे नाव अजय ठाकूर असल्याचे समजते. पोलिसांनी त्याचे स्केच तयार करून केले आहे. काही दिवसांपूर्वी तो खुटवट नगरात रहायचा. पोलिसांनी तेथे तपास केल्यावर तो फरार असल्याचे समजले. ठाकूर हा फिरस्ता असून अनेकांना विविध माध्यमातून गंडवतो. जेमतेम पैसे मिळाल्यावर भाड्याने राहत असलेली खोली बदलतो, अशी माहिती पोलिसांना मिळाली आहे.