मिरा-भाईंदर-वसई-विरार पोलिस आयुक्तालय हद्दीत पाचपेक्षा अधिक नागरिकांना एकत्र येण्यास पोलिसउपायुक्तांनी मनाई आदेश लागू केला आहे. त्यानंतरही भाईंदरमध्ये नियम धुडकावून शनिवारी गरब्याचे आयोजन करण्यात आले होते. या प्रकरणी भाईंदर पश्चिम पोलिसांनी हॉलमालकासह आयोजकांविरोधात गुन्हा दाखल केला आहे.
भाईंदर पश्चिम पोलिस शनिवारी रात्री आठ वाजताच्या सुमारास गस्त घालत होते. यावेळी मिळालेल्या माहितीनुसार, त्यांनी भाईंदर पूर्व-पश्चिमेला जोडणाऱ्या पुलाखाली असणाऱ्या जेसीएस हॉलवर छापा टाकला. तेव्हा पोलिसांना १५० ते २०० नागरिक स्पीकर लावून गरबा खेळत असताना दिसून आले. करोनाकाळात गर्दी करत त्यातील अनेकांनी मास्कही लावला नव्हता. पोलिस उपायुक्तांनी मनाई आदेश लागू केले असतानाही गरब्याचे आयोजन करण्यात आल्याने भाईंदर पश्चिम पोलिसांनी हॉलमालक हसमुख परिहार व यश छाजड या तरुणाविरोधात विविध कलमांतर्गत रविवारी गुन्हा दाखल केला आहे.