वाळूज येथे निसर्गाच्या किमयेने बागेत लावलेल्या अळूच्या पानाला फुल आल्याने परिसरात कुतूहलाचा विषय झाला आहे. आतापर्यंत अळूच्या पानाला फुल पाहिले नसल्याने आश्चर्य व्यक्त केलं जात आहे. परिसरातील नागरिक अळूच्या पानाला आलेले फुल पाहण्यासाठी मोठी गर्दी करत असून अनेक वयोवृद्ध नागरिकांनी आयुष्यात हे फुल पाहिले नसल्याचं सांगत आहेत.
दररोज नित्यनियमित राजपूत यांच्या पत्नी तुळसाबाई झाडांना पाणी देत असताना सोमवारी त्यांना अळूच्या रोपट्याला फुल व कळी आल्याचे दिसले.
यावेळी त्यांनी याची माहिती कुटुंबाला तसंच वसाहतीतल्या नागरिकांना दिली असता अनेक वयोवृद्ध नागरिकांनी अशा प्रकारे अळूच्या रोपट्याला फुल आल्याचं प्रथमच पाहत असल्याचं सांगितलं. निसर्गाच्या किमयेने कुंडीत लावलेल्या चार रोपट्यांपैकी एकाला पिवळसर रंगाचं फुल आलं असून दुसऱ्या रोपट्याला कळी दिसत आहे. अळूच्या रोपट्याला आलेलं फुल परिसरात चर्चेचा विषय झाला असून निसर्गाचा चमत्कार पाहण्यासाठी नागरिक राजपूत यांच्या घरी मोठी गर्दी करत आहेत.