साखरपुडा झाल्यानंतर लग्नाचा मुहूर्त निघाला. वधुपित्याने मुलीच्या लग्नाच्या पत्रिका छापून नातेवाइकांना वाटल्याही. ऐनवेळी नवरदेवाने हुंड्याची मागणी केली. वधुपित्याने हुंडा देण्यास नकार दिल्याने नवरदेव लग्न मंडपात आलाच नाही. लाखनी शहरातील आदर्शनगरात हा प्रकार घडला. याप्रकरणी नवरदेवाविरुद्ध लाखनी पोलिसात गुन्हा नोंदविण्यात आला आहे.
लाखनी येथील आदर्शनगरातील युवतीचे लग्न वर्धा येथील केळकरवाडी येथील राजेंद्र वामनराव शिंदे याच्यासोबत जुळले. १५ ऑगस्ट रोजी साखरपुडा होऊन १६ सप्टेंबर ही लग्नाची तारीखसुद्धा निघाली. वधुपित्याने नवरदेवाला लग्नाचे कपडे घेण्याकरिता पैसेसुद्धा दिले होते. काही दिवसातच लग्न होणार असल्याने लग्नपत्रिका छापून नातेवाइकांना वाटून दिल्या. सभागृहाची बुकिंग केली. लग्नासाठी आवश्यक सर्व साहित्याची खरेदीही करण्यात आली. पण, नवरदेवाने लग्न तोंडावर असताना दोन तोळ्याची सोन्याची चैन, दोन ट्रॅव्हल्सचा खर्च हुंडा म्हणून मागितला. याला वधुपित्याने नकार दिला. नवरदेव लग्नासाठी आलाच नाही. याविरोधात वधुपित्याने लाखनी पोलिसात तक्रार दाखल केली. यावरून राजेंद्र शिंदे याच्याविरुद्ध हुंडा प्रतिबंधक कायद्यान्वये गुन्हा नोंदविण्यात आला आहे.