बाजारपेठेत गणेश चतुर्थीसह गौरी आवाहनाचीही जय्यत तयारी सुरू आहे. गौरीचे मुखवटे, सजावट साहित्य, दागिन्यांसह कपड्यांचीही विशेष खरेदी केली जात आहे. यंदा पारंपरिक नऊवारी साड्या महिलावर्गाच्या खास पसंतीस असल्याचे विक्रेत्यांकडून सांगितले जातेय. त्यामुळे यंदा पारंपरिक नऊवारीत गौराईचे रुप खुलणार आहे. अनेक विक्रेत्यांनी रेडिमेड नऊवार आणि सहावार साड्या उपलब्ध करुन दिल्याने या साड्यांनाही विशेष मागणी आहे.येत्या रविवारी (दि. १२) गणरायाच्या स्वागतानंतर गौरीचेही आगमन होणार आहे. तीन दिवसांसाठी माहेरवासाला येणाऱ्या या माहेरवाशीणींच्या स्वागतात तसूभरही कमी न ठेवण्याचा निर्धार महिलांनी केला आहे. गेल्यावर्षी करोनाच्या सावटामुळे जवळपास सर्वच सणांचा उत्साह काहीसा कमी झाला होता. परंतु, यंदा करोनाचे निर्बंध कमी झाल्याने गणेशोत्सवासह गौरी आवाहनाची जोरदार तयारी सुरू आहे. यानिमित्ताने बाजारपेठेत चैतन्यमय वातावरण आहे.
वैशिष्टपूर्ण साड्यांना पसंती
गौरीच्या स्वागताची जय्यत तयारी करताना तिच्या पेहरावाचीही खास काळजी महिलांकडून घेतली जात आहे. यानिमित्ताने नऊवार आणि सहावार साड्यांना मोठी मागणी आहे. इतर कोणत्याही कपड्यांऐवजी खास मोराच्या काठांची पैठणी, हॅन्डवर्क इरकल, खण, मऊ सिल्क, बनारसी शालू या सहावार तसेच नऊवार साड्या बाजारपेठेत दाखल झाल्या आहेत. गौरीच्या उभ्या आणि बैठ्या प्रकारांनुसार या साड्या शिवून मिळत आहेत. नऊवार साड्यांमध्ये ‘ब्राह्मणी’, ‘पेशवाई’, ‘मस्तानी’ या प्रकारच्या नऊवार साड्यांना खास पसंती मिळत आहे. गौरीसोबतच बाळांसाठी कपड्यांचीही खरेदी केली जात आहे. यामध्ये खणाच्या परकर आणि पोलकं, धोतर, जॅकेट विक्रीसाठी आलेले आहे.
फेट्याने वाढणार शान
ज्याप्रमाणे महिला नऊवारीवर फेटा घालतात, त्याचप्रमाणे गौरीसाठीही खास पैठणीचा फेटा तयार करण्यात आला आहे. या पैठणीच्या फेट्यांचीही मोठ्या प्रमाणात खरेदी केली जात आहे. गौरीच्या पारंपरिक महाराष्ट्रीयन लूकसाठी फेटा खरेदी केला जात आहे. मागच्या बाजूने खुला असल्याने तो घालणेही अतिशय सोपे आहे. महालक्ष्मीसाठी नऊवार शिवून घेणारे फेटा खरेदी करत असल्याचे विक्रेत्यांकडून सांगितले जात आहे.
…अशा आहेत किमती
नऊवार साडी (शिवून घेतलेली) : २००० ते ५०००
नऊवार साडी : ५०० रुपयांपासून
सहावार साडी (शिवून घेतलेली) : १५०० ते ४५००
सहावार साडी : ५०० रुपयांपासून
लहान मुलांचे कपडे : ५०० रुपयांपासून
फेटा : २५० ते ५०० रुपये
गौरीसाठी महिलांकडून खास नऊवार आणि सहावार साड्या शिवून घेतल्या जात आहेत. यामध्येही नऊवार साड्यांना विशेष मागणी आहे. नऊवार साडीवर खास पैठणीचा फेटाही खरेदी केला जात असून, अनेकांकडून पारंपरिक महाराष्ट्रीयन लूकलाच प्राधान्य दिले जात आहे. – दुर्गेश खैरनार, साडी विक्रेते