जमिनीच्या वादातून नातवाने डोक्यात वरवंटा घालून आजोबांचा खून केल्याची घटना तालुक्यातील चिकटगाव येथे मंगळवारी घडली. उत्तम महादू निकम (६७) असे या घटनेतील मृताचे नाव आहे.
उत्तम निकम व त्यांच्या भावाचा नातू भाऊसाहेब चंद्रकांत निकम (२४) या दोघांमध्ये गावरान जमिनीतील खळ्याच्या जागेचा जुना वाद होता. या जागेवरून त्यांच्या दोन्ही कुटुंबीयांमध्ये नेहमी वाद होत होते. या वादातून मंगळवारी भाऊसाहेब याने आजोबा उत्तम निकम यांच्या डोक्यात वरवंटा घातला. त्यामुळे ते गंभीर जखमी होऊन खाली कोसळले. नातेवाइकांनी त्यांना ताबडतोब
औरंगाबाद येथील घाटी रुग्णालयात दाखल केले. उपचार सुरू असताना त्यांचा मृत्यू झाला. या घटनेची शिवूर पोलिस ठाण्यात नोंद करण्यात आली आहे.