पॉप्युलर पब्लिशर आणि डिस्ट्रिब्युटर्स’ या प्रकाशन संस्थेच्या सीबीएसई अभ्यासक्रमांच्या पुस्तकांचे काही बुकस्टॉल चालक प्रती काढून त्यांची बेकायदा विक्री करत असल्याचे उघडकीस आले आहे. खांदा कॉलनीतील हरी ओम बुक स्टोअरने या प्रकाशन संस्थेच्या पुस्तकांच्या झेरॉक्स काढून त्यांची विक्री केल्याचे आढळून आल्याने खांदेश्वर पोलिसांनी या बुक स्टॉलचालकाविरोधात कॉपिराइटसह बनावटगिरी केल्याप्रकरणी गुन्हा दाखल केला आहे.
पवई येथील ‘पॉप्युलर पब्लिशर आणि डिस्ट्रिब्युटर्स’ आणि ‘व्ही. कनेक्ट एज्युकेशन’ या दोन्ही कंपन्यांची कार्यालये मुंबई, दिल्ली, बेंगळुरू आणि इतर ठिकाणी असून महाराष्ट्रातील तसेच भारतातील अनेक राज्यांतील सीबीएसई शाळांमध्ये ‘पॉप्युलर पब्लिशर आणि डिस्ट्रिब्युटर्स’ वितरक म्हणून काम करत आहे. पनवेलमधील न्यू होरायझन पब्लिक स्कूल या शाळेलासुद्धा याच वितरक कंपनीकडून तसेच त्यांच्या अधिकृत वेबसाइटवरून पुस्तकांची विक्री केली जाते. या पुस्तकांच्या प्रकाशनाचे हक्क त्यांच्याकडेच आहेत. मात्र, त्यानंतरही खांदा कॉलनीतील हरी ओम बुक स्टोअर चालकाने या प्रकाशन संस्थेची कोणत्याही कंपनीची पूर्वपरवानगी न घेता त्यांच्या प्रकाशनांच्या पुस्तकांच्या रंगीत झेरॉक्स काढून त्यांची विक्री करण्यास सुरुवात केली होती. ही बाब कंपनीच्या लक्षात आल्यानंतर कंपनीच्या अधिकाऱ्यांनी खांदेश्वर पोलिस ठाण्यात तक्रार दाखल केली. त्यानुसार पोलिसांनी हरी ओम बुक स्टोअरचालक सुरेश चौधरी आणि दियाराम चौधरी यांच्या विरोधात फसवणुकीसह, कॉपिराइट व बनावटगिरी केल्याप्रकरणी गुन्हा दाखल करून दोघांना ताब्यात घेतले आहे. तसेच, या दोघांनी ज्या झेरॉक्स मशिनवर पुस्तकांच्या झेरॉक्स काढल्या, ती झेरॉक्स मशिन व इतर साहित्यही पोलिसांनी जप्त केले आहे.