डहाणू तालुक्यातील ग्रामीण भागात रविवारी पहाटे आगर येथील उपजिल्हा रुग्णालयाने करोनाबाधित रुग्णाला दाखल करून घेण्यास नकार दिला. या रुग्णाचा रक्तदाबाचा त्रास वाढून काही तासांनंतर त्याचा मृत्यू झाल्याची घटना घडली. खाट उपलब्ध नसल्याचे कारण देत, रुग्णालयाने उपचारापासून वंचित ठेवल्याचा आरोप रुग्णाच्या नातेवाईकांनी केला.
डहाणू तालुक्यात रविवारी पहाटे साडेतीन वाजण्याच्या सुमारास गृहविलगीकरणात उपचार घेणाऱ्या ४२ वर्षीय व्यक्तीची प्रकृती अचानक खालावल्याने नातेवाईकांनी रुग्णवाहिका मिळविण्यासाठी प्रयत्न सुरू केले. मात्र त्याला अपयश आल्यानंतर रुग्णाच्या खासगी वाहनातून, डहाणूतील आगर उपजिल्हा रुग्णालयातील करोना केंद्रात नेण्यात आले. खाटा उपलब्ध नसल्याचे सांगत, रुग्णाला दाखल करण्यास नकार देण्यात आला. त्यानंतर नाईलाजास्तव त्याला घरी आणल्यानंतर काही वेळाने त्याचे निधन झाले, असे नातेवाईकांनी सांगितले. तीन-चार दिवसांपूर्वी या रुग्णाचा अहवाल पॉझिटिव्ह आल्यानंतर तो गृहविलगीकरणात होता. उपचाराचे दरवाजे बंद झाल्याने त्याचा मृत्यू ओढावल्याचा आरोप नातेवाईकांनी केला आहे. रुग्णाला दवाखान्यात नेण्यापासून अंत्यसंस्कार करेपर्यंत सर्व नातेवाईकांनीच केले, अशी माहिती नाव न छापण्याच्या अटीवर उपस्थितांनी दिली. ग्रामीण भागात वाढत्या रुग्णसंख्येमुळे नवीन विलगीकरण कक्षाची स्थापना करूनही खाटा उपलब्ध होत नसल्याचे दिसून येत आहे.