एकीकडे करोना महामारीचा सामना करताना अनेकांची दमछाक होत असताना प्रचंड इच्छाशक्तीच्या जोरावर कल्याणातील ९७ वर्षीय आजोबा रामचंद्र नारायण साळुंखे यांनी करोनाशी यशस्वी लढा दिला आहे. बुधवारी रुग्णालयातून डिस्चार्ज घेताना त्यांनी करोनाला न घाबरता त्याच्याशी लढून त्याला हरवायचे, असा संदेश त्यांनी इतर रुग्णांना दिला.
मागील महिन्यापासून सर्वत्र थैमान घालणाऱ्या करोनाची रुग्णसंख्या वाढत असून प्रशासनाची यंत्रणा तोकडी पडत आहे. न मिळणारा ऑक्सिजन, इंजेक्शनचा तुटवडा, रुग्णांना उपचारासाठी न मिळणाऱ्या खाटा हा ससेमिरा सोडवताना प्रशासन मेटाकुटीला आले आहे. तर दुसरीकडे वेळेवर उपचार मिळत नसल्याने मृत्युदरदेखील वाढू लागला आहे. या नकारात्मक परिस्थितीतही कल्याणमध्ये ९७ वर्षांच्या साळुंखे आजोबांनी करोनाला धोबीपछाड केले आहे. १५ दिवसांपासून पालिकेच्या कल्याण पश्चिमेकडील लालचौकी आर्ट गॅलरी कोविड रुग्णालयामध्ये त्यांच्यावर उपचार सुरु होते. डॉक्टरांनी केलेले योग्य उपचार आणि त्या उपचारांना त्यांनी खंबीरपणे दिलेली साथ त्यांना सहीसलामत घरी घेऊन गेली आहे. दरम्यान, कल्याण डोंबिवलीतील इतर रुग्णांनी घाबरून न जाता धैर्याने करोनाचा मुकाबला केल्यास त्याला परतावून लावू शकतो, असा संदेश या आजोबांनी दिला आहे.