रविवार पेठ, गणेश पेठ, बुधवार पेठ, शुक्रवार पेठ भागांत आत्यावश्यक दुकानांव्यरिक्त इतर दुकाने सुरू केल्याचे आढळले. त्यानंतर त्यांच्यावर पोलिसांनी कारवाईचा बडगा उचलला आहे. या भागांतील सहा दुकानदारांवर गुन्हे दाखल केले आहेत.
शहरात करोनाचा संसर्ग वाढत असल्यामुळे निर्बंध लागू करण्यात आले आहे. शहरातील फक्त अत्यावश्यक सेवेतील दुकाने सुरू ठेवण्यास परवानगी देण्यात आली आहे. सोमवारी सकाळी पेठांमध्ये काही दुकानदारांनी दुकाने उघडल्याचे दिसून आले. व्यापाऱ्याच्या संघटनेकडून दुकाने सुरू ठेवण्याची मागणी केली जात आहे. दुकाने सुरू करण्यास परवानगी न दिल्यास दुकाने सुरू ठेवण्याची भूमिका घेतली होती. मात्र, रविवारी झालेल्या बैठकीत हा निर्णय तूर्तास मागे घेण्यात आला होता. त्यानंतर काही दुकानदारांमध्ये संभ्रमाचे वातावरण निर्माण झाले होते. त्यामुळे पेठांबरोबरच इतर ठिकाणी काही दुकाने सकाळी उघडल्याचे दिसून आले. पेठांमध्ये दुकाने उघडल्याचे आढळल्यानंतर फरासखाना पोलिस ठाण्याचे वरिष्ठ निरीक्षक राजेद्र लांडगे यांनी त्यांच्या हद्दीतील सहा दुकानदारांच्या विरोधात पोलिस आदेशाचा भंग करणे, साथरोग प्रतिबंधक कायदा, राष्ट्रीय आपत्ती व्यवस्थापन कायद्यानुसार गुन्हे दाखल करण्यात आले आहेत.