ठाणे शहरामध्ये करोनारुग्णांची संख्या वाढत असताना शहरातील लहान मुले आणि किशोरवयीन मुलांचे बाधित होण्याचे प्रमाण वाढल्याचे समोर आले आहे. ० ते १९ वयोगटातील करोनाबाधित रुग्णांची संख्या ७,९४७वर पोहोचली आहे. त्यामध्ये ० ते १० वयोगटातील २,६०५ तर ११ ते १९ वयोगटातील मुलांची संख्या ५,३४२ आहे. प्रामुख्याने घराबाहेर जाणाऱ्या मध्यमवयीन नागरिकांना करोनाची लागण होत असल्याचे सुरुवातीपासून दिसून येत होते. परंतु दुसऱ्या टप्प्यांत मुलांमध्येही करोनाबाधित होण्याचे प्रमाण कमालीचे वाढले आहे. त्यामुळे करोनाबाधितांमध्ये सुमारे १० टक्के लहान मुले आणि किशोरवयीन मुलांचा समावेश आहे.
करोनाचा प्रादुर्भाव सुरू झाल्यापासून आत्तापर्यंत करोनावाढीमध्ये सर्वाधिक संख्या ही मध्यमवयीन महिला आणि पुरुषांची होती. परंतु करोनाच्या दुसऱ्या लाटेमध्ये बाधित लहान मुलांचाही आकडा वाढू लागल्याचे धक्कादायक वास्तव समोर आले आहे. एकूण करोनाबाधितांमध्ये लहान आणि किशोरवयीन मुलांचे प्रमाण १० टक्के असल्याने चिंता वाढली आहे. चिंतेची बाब म्हणजे १९ वर्षांखालील ९ रुग्णांचा मृत्यू झाला आहे. ठाणे शहरामध्ये आढळणाऱ्या करोनारुग्णांमध्ये सर्वाधिक रुग्ण हे ३१ ते ४० वयोगटातील असून त्यांची संख्या १८,७८९ आहे. त्या खालोखाल ४१ ते ५० वयोगटातील नागरिकांचा समावेश आहे. तर, ५१ ते ६० वयोगटातील १४,६०४ व २१ ते ३० वयोगटातील १४,०९४ जण करोनाबाधित आहेत. ६० पेक्षा अधिक वयोगटातील करोनाबाधित व्यक्तींची संख्या १५,२०१ असल्याचे आकडेवारीनुसार समोर आले आहे. सर्वच वयोगटांमध्ये महिलांपेक्षा पुरुषांची संख्या अधिक असल्याचे स्पष्ट झाले आहे.