उज्जैनमधील फ्रिगंज येथील एका खासगी कोविड रुग्णालयाला रविवारी सकाळी आग लागली. या आगीत ४ रुग्ण होरलपळले आहेत. यातील एका जणाची प्रकृती गंभीर असल्याचं सांगण्यात येतंय. घटनेवेळी हॉस्पिटलमध्ये ८० रुग्णांवर उपचार सुरू होते. त्यापैकी २४ रुग्ण हे करोनाचे होते. सर्व रुग्णांना दुसऱ्या हॉस्पिटलमध्ये हलवण्यात आलं आहे. शॉर्ट सर्किटमुळे आग लागल्याचं सांगण्यात येतंय.
फ्रिगंजमध्ये पाटीदार हॉस्पिटल अँड रिसर्च सेंटर या नावाने उमाशंकर पाटीदार यांचे हॉस्पिटल आहे. दोन मजल्यांच्या या खासगी हॉस्पिटलमध्ये आज सकाळी ११.३० वाजता दुसऱ्या मजल्यावरी कोविड वॉर्डमधील वार्डबॉयने धुर येताना बघितला. त्याने याची माहिती व्यवस्थापनाला दिली. बघता बघता इमारतीत हा धुर पसरला. यामुळे खिडक्या तोडून रुग्ण कसेबसे बाहेर पडले. माहिती मिळताच अग्निशमन दलाच्या ४ गाड्या घटनास्थळी दाखल झाल्या. त्यांनी आर्ध्या तासात आगीवर नियंत्रण मिळवलं.
आग लागल्यानंतर हॉस्पिटलमध्ये दाखल असलेल्या ८० रुग्णांना बाहेर काढण्याचं काम सुरू झालं. यात महिला आणि लहान मुलांचाही समावेश आहे. दाखल अलेल्या रुग्णांचे नातेवाईकही यावेळी हॉस्पिटलमध्ये होते. जवळपास १ तासांच्या अथक प्रयत्नानंतर २० अॅम्ब्युलन्सच्या मदतीने सर्व रुग्णांना दुसऱ्या हॉस्पिटलमध्ये हलवण्यात आलं. आगीमुळे कोविड वॉर्डमधील सर्व मशिन्स आणि फर्नीचर जळून खाक झालं.
हॉस्पिटलमधील फायर अलार्म असूनही तो घटनेवेळी वाजलाच नाही. यामुळे अग्नी सुरक्षेवरून हॉस्पिटलवर प्रश्न उपस्थित केले जात आहे. आग नियंत्रणात आणणरे उपकरणंही योग्य नव्हती. तर अग्निशमन दल येण्यापूर्वी आगीवर नियंत्रण मिळवण्याचा दावा हॉस्पिटल प्रशासनाने केला आहे.