दारूच्या आहारी गेलेल्या पतीकडून होणारी दररोजची मारहाण असह्य झाल्याने घर सोडून जाणाऱ्या पत्नीच्या डोक्यात पतीने हातोड्याचे घाव घालत तिला जबर जखमी केले. यानंतर घरातून निघून गेलेल्या पतीने मालगाडीखाली आत्महत्या केल्याची धक्कादायक घटना डोंबिवली पूर्वेकडील जुनी डोंबिवली परिसरात घडली. राज हर्ष अगरवाल उर्फ गुप्ता (५०) असे या पतीचे नाव आहे.
काजल आणि राज अगरवाल हे दोघे पती-पत्नी दोन मुले आणि राजच्या वडिलांसह जुनी डोंबिवली परिसरातील लक्ष्मी निवास या इमारतीत राहतात. राज इस्टेट एजंट तर काजल ब्युटीपार्लर चालवून कुटुंबाचा उदरनिर्वाह करत होते. मात्र काही दिवसांपासून राज सतत दारू पिऊन शिवीगाळ आणि मारहाण करत असल्याने पती-पत्नींमध्ये भांडणे वाढली होती. यामुळे त्रासलेल्या काजलने पतीविरोधात विष्णूनगर पोलिस ठाण्यात तक्रार देत त्याच्यापासून वेगळे राहण्याचा निर्णय घेतला होता. डोंबिवलीत दुसरे एक भाड्याचे घर घेत आपले सामान नेण्यासाठी काजल १ एप्रिल रोजी दुपारी चारच्या सुमारास मैत्रिणीसोबत घरी आली होती. ती घरात सामान बांधत असताना पती, मुलगी आणि सासरे घरी होते. यावेळी ‘राजने पत्नीची समजूत काढतो, तुम्ही खाली जा’ असे सांगत वडील आणि मुलीला घरातून बाहेर पाठवले. यानंतर पाठमोऱ्या असलेल्या काजलच्या डोक्यावर लोखंडी हातोड्याने सात ते आठवेळा घाव घातले. तिला जखमी अवस्थेत सोडून राज घरातून निघून गेला. त्याच अवस्थेत काजल हिने खाली थांबलेल्या मैत्रिणीला फोन करून बोलावून घेत तिच्या मदतीने शास्त्रीनगर रुग्णालयात दाखल झाली. मात्र तिच्या डोक्याचे हाड फ्रॅक्चर झाल्याने तिला डोंबिवलीतील खासगी रुग्णालयात पाठवले. काजलवर मुंबईतील नायर रुग्णालयात उपचार सुरू आहेत. तर, घरातून निघून गेलेल्या राजने रागाच्या भरात भिंवडी रेल्वे स्थानकानजीक मालगाडीखाली आत्महत्या केल्याचे विष्णूनगर पोलिसांनी सांगितले. या प्रकरणी पोलिस उपनिरीक्षक कोळी अधिक तपास करत आहेत.