चार महिन्यांच्या मुलीचे अपहरण करून तिची गुजरातमध्ये नेऊन विक्री करणाऱ्या टोळीचा मानखुर्द पोलिसांनी भांडाफोड केला. मानखुर्द पोलिसांनी या प्रकरणात चार जणांना अटक केली असून, यामध्ये तीन महिलांचा समावेश आहे. या टोळीने आणखी काही मुलांची विक्री केल्याची शक्यता पोलिसांनी व्यक्त केली आहे.
मानखुर्दमध्ये राहणाऱ्या एका महिलेच्या झोपडीतून १ एप्रिलच्या मध्यरात्री तिची चार महिन्यांची मुलगी गायब झाली. ही मुलगी कुठे चालच जाणे शक्य नसल्याने तिला पळवल्याचा संशय असल्याने आईने दिलेल्या तक्रारीवरून मानखुर्द पोलिसांनी अपहरणाचा गुन्हा दाखल केला. मुलीच्या आईने याच परिसरात राहणारी महिला शर्मिन खान आणि सिद्धीक खान या दोघांवर संशय व्यक्त केला. त्यानुसार मानखुर्द पोलिसांनी या दोघांना ताब्यात घेऊन त्यांची उलटसुलट कसून चौकशी केली. सुरुवातीला टाळाटाळ करणाऱ्या या दोघांनी मुलीला पळवून ॲण्टॉप हिल येथील फरझाना शेख या महिलेच्या ताब्यात दिल्याचे सांगितले. पोलिसांनी फरझानाला शोधून काढले. तिच्या चौकशीत चेंबूर येथील आशा पवार या महिलेचे नाव पुढे आले. पोलिसांनी आशालासुद्धा ताब्यात घेतले. तिने मुलीस माटुंगा येथील ज्युलिया फर्नांडिस हिला विकल्याची माहिती दिली.
चौकशीमध्ये मोठी साखळी समोर येत असल्याने पोलिसही चक्रावले आहेत. पोलिसांनी ज्युलिया हिची कसून चौकशी केली असता तिने गुजरातमधील महिला डॉक्टर माया इंबाळे हिला दिल्याचे सांगितले. त्यानंतर ज्युलिया हिची १० दिवसांपूर्वीच प्रसूती झाल्याने पोलिसांनी तिला विश्वासात घेऊन चौकशी केली. तेव्हा तिने बेंगळुरू येथे पती आणि बहिणीला पाठवून मुलीला घेऊन येण्यास सांगितले. मानखुर्द पोलिसांनी मुलीला तिच्या आईच्या स्वाधीन केले. त्यामुळे या सर्वांनी असे कृत्य का केले? प्रत्येकाला यासाठी किती पैसे मिळाले? याबाबत पोलिस तपास करीत आहेत.