घरगुती गॅसच्या सिलिंडरचे भाव सातत्याने वाढत असून, वाढत्या दरामुळे फुलंब्री तालुक्यातील ग्रामीण भागात स्वयंपाकासाठी पुन्हा चुली पेटल्याचे चित्र आहे. ग्रामीण भागातील महिलांना चुलीचा होणारा त्रास कमी व्हावा, यासाठी सुरू करण्यात आलेल्या ‘उज्ज्वला गॅस योजने’चा हेतू धुळीस मिळत आहे.
घरगुती गॅस सिलिंडरचे दर ८३० रुपयांपर्यंत पोहोचला असून, महिनाभरात तीन वेळा झालेल्या वाढीमुळे १०० रुपयांनी दरांमध्ये वाढ झाली आहे. वाढत्या दरामुळे, सिलिंडर विकत घेणे परवडणारे नसल्याने ग्रामीण भागातील महिलांनी स्वयंपाकासाठी चुली पेटू लागल्या आहेत. ग्रामीण भागात चुलीसाठी सरपण तुराट्या, गोवऱ्या सहज उपलब्ध होतात. त्यामुळे गॅस पेटवण्यापेक्षा चूल पेटवण्याला प्राधान्य दिले जात आहे. करोनाच्या प्रादुर्भावामुळे आर्थिक संकट असतानाच, महागाईमुळे सामान्यांचे कंबरडे मोडले आहे. त्यात आता गॅस सिलिंडरचे दर वाढल्यामुळे बजेट कोलमडून गेले आहे.