रस्त्यावरून ये-जा करणाऱ्या लोकांना थांबवून रंग खेळण्यासाठी लहान मुलांनी बांधलेली नायलॉनची दोरी गळ्याला लागून झालेल्या गंभीर दुखापतीमुळे दुचाकीस्वाराचा मृत्यू ओढवल्याची दुर्दैवी घटना धुलीवंदनाच्या दिवशी शहापूर तालुक्यामध्ये घडली. या प्रकरणी १२ वर्षांचा मुलगा आणि नऊ वर्षाच्या मुलीविरुद्ध शहापूर पोलिस ठाण्यात गुन्हा दाखल करण्यात आला आहे.
शहापूर तालुक्यातील साईनगर चेरपोली येथील संतोष पाटील आणि चिंतामण भोईर हे दोघे मित्र सोमवारी दुपारी दुचाकीवरून तांबडमाळ येथे फिरण्यासाठी जात होते. थानशेतपाडा येथे काही मुले धुळवड खेळत होती. या मुलांनी रस्त्यावरून येणाऱ्या आणि जाणाऱ्या लोकांना थांबवून रंग खेळण्यासाठी रस्त्यावर नायलॉनची दोरी बांधली होती. मुलांनी दोरी बाजूला करत दुचाकीला पुढे जाण्यास रस्ता दिला. त्यानंतर दोघेही दुपारी ३ वाजता पुन्हा घरी जाताना थानशेतपाडा येथे आल्यानंतर त्या ठिकाणी एक मुलगा आणि एक मुलगी उभे होते. ‘थांबा, थांबा’ असे ही मुले ओरडली. परंतु, रस्त्यावर बांधलेली नायलॉनची दोरी त्यांना दिसली नाही. दुचाकीचालक चिंतामण याच्या गळ्याला ती लागली. त्यामुळे ते दोघेही दुचाकीवरून खाली पडले. बेशुद्ध झालेल्या चिंतामणच्या गळ्याला जखम होऊन गळ्यातून रक्तस्त्राव होऊ लागला. तात्काळ त्यांना शहापूरमधील उपजिल्हा रुग्णालयात नेण्यात आले. मात्र, चिंतामणला तपासल्यानंतर डॉक्टरांनी त्याचा मृत्यू झाल्याचे घोषित केले. ही दोरी नऊ वर्षांची मुलगी आणि १२ वर्षांचा मुलगा यांनी बांधल्याची बाब समोर आली.