जिल्ह्याच्या ग्रामीण भागात काही विशिष्ट तालुक्यांमध्ये करोना रुग्णांची वेगाने वाढणारी आकडेवारी चिंताजनक आहे. करोनाच्या दुसऱ्या लाटेत बहुतांश रुग्णांनी होम क्वारंटाइन होणे पसंत केले आहे. होम क्वारंटाइन असताना निर्देशांचे पालन या रुग्णांकडून कसोशीने होते आहे काय, यावर देखरेख ठेवण्यासाठी जिल्हा परिषदेच्या आरोग्य विभागाने आता रुग्णांवर व्हिडीओ कॉलद्वारे वॉच ठेवण्याचा निर्णय घेतला आहे.
ग्रामीण भागात पॉझिटिव्ह रुग्णांची वाढती संख्या डोकेदुखी ठरत आहे. होम क्वारंटाइन केलेल्या रुग्णांना घराबाहेर येण्यास मनाई आहे. त्यांच्या हातावरही होम क्वारंटाइनचे शिक्के मारण्यात आले आहेत. या रुग्णांपासून करोनाचा प्रादुर्भाव इतरांना होऊ नये, यासाठी त्यांच्यावर ग्रामसेवक, आशा कर्मचारी व आरोग्य विभागातील कर्मचाऱ्यांच्या माध्यमातून लक्ष ठेवण्यासाठी जबाबदाऱ्या निश्चित करण्यात आल्याची माहिती जिल्हा आरोग्याधिकारी डॉ. कपिल आहेर यांनी दिली.
करोनावर नियंत्रण मिळविण्यासाठी ग्रामीण भागात चाचण्यांची संख्यादेखील वाढविण्यात आली आहे. काही दिवसांपूर्वी जेथे दिवसाकाठी सुमारे ८०० चाचण्या पार पडत त्या ठिकाणी सुमारे चार हजारांवर चाचण्या रोज घेण्यात येत आहेत. अँटिजेन आणि आरटीपीसीआर अशा दोन्ही चाचण्यांचा यात समावेश आहे. कँटोन्मेंट झोनमधील नागरिकांच्या चाचण्यांवर विशेषत्वाने भर दिला जात आहे. यामध्ये साधारणत: लक्षणे नसणाऱ्या रुग्णांची संख्या जास्त आढळून येत असल्याचेही डॉ. आहेर यांनी सांगितले. दरम्यान, जिल्ह्यात आतापर्यंत एकूण दोन लाखांपेक्षा अधिक नागरिकांनी लसीकरणाचा लाभ घेतला आहे. जसजशी लशींची उपलब्धता वाढत जाईल तसतशी लस घेणाऱ्यांच्या संख्येतही वेगाने भर पडेल, असेही ते म्हणाले. सद्य:स्थितीत लसीकरणासाठी आरोग्य विभागाकडील यंत्रणेचे नियोजन पूरक असल्याचेही डॉ. आहेर यांनी सांगितले.