रिझर्व्ह बँकेचे माजी डेप्युटी गव्हर्नर कमलेश चंद्र चक्रवर्ती (के. सी चक्रवर्ती) यांचे आज मुंबईतील निवासस्थानी पहाटे हृदयविकाराच्या झटक्याने निधन झाले. ते ६९ वर्षांचे होते. त्यांच्या पश्चात पत्नी आणि मुलगा असा परिवार आहे. चक्रवर्ती यांनी २००९ ते २०१४ या काळात रिझर्व्ह बँकेच्या डेप्युटी गव्हर्नरपदाची जबाबदारी पार पाडली होती.
बँकिंग क्षेत्रातील प्रदीर्घ अनुभव असलेल्या चक्रवर्ती यांच्या डेप्युटी गव्हर्नरपदाच्या कार्यकाळात ग्रामीण बँकांचे सक्षमीकरण, बँकेच्या ग्राहकांचे अधिकार, लघु वित्त संस्था आणि लघु व मध्यम उद्योजकांना पत पुरवठा याबाबत निर्णय घेण्यात आले होते. आर्थिक सर्वसमावेशाला प्रोत्साहन देणाऱ्यांपैकी चक्रवर्ती एक होते. विशेषतः ग्राहकांवर आकारल्या जाणारी बँक शुल्क रद्द करण्यात चक्रवर्ती यांचा मोठा वाटा आहे. यामुळे बँकिंग सेवा अधिक ग्राहकाभिमुख झाली.
आपल्या करियरच्या सुरुवातीच्या काळात चक्रवर्ती यांनी बनारस हिंदु विद्यापीठात त्यांनी प्राध्यापक म्हणून काम केले. त्यानंतर ते सार्वजनिक क्षेत्रातील बँक ऑफ बडोदा या बँकेत रुजू झाले. २००१ ते २००४ या काळात त्यांनी बँक ऑफ बडोदाच्या ब्रिटनमधील व्यवसायाचे प्रमुखपद सांभाळले होते. पुढे इंडियन बँक आणि पंजाब नॅशनल बँक या बँकांचे त्यांनी नेतृत्व केले.
पंजाब नॅशनल बँकेचे प्रमुख असताना के. सी चक्रवर्ती यांनी रिझर्व्ह बँकेचे डेप्युटी गव्हर्नर म्हणून निवड झाली. बँकिंग क्षेत्रातील स्पष्टवक्ते आणि परखड बोलणारे म्हणून चक्रवर्ती प्रसिद्ध होते. डेप्युटी गव्हर्नर पदाचा कार्यकाळ पूर्ण होण्याच्या तीन महिने आधी चक्रवर्ती यांनी राजीनामा दिला होता. डी. सुब्बाराव आणि रघुराम राजन या माजी रिझर्व्ह बँक गव्हर्नराच्या नेतृत्वात के. सी चक्रवर्ती यांनी डेप्युटी गव्हर्नर म्हणून काम केले.