नवी मुंबई महापालिका हद्दीत करोना रुग्णसंख्या वाढत असतानादेखील बाजार समितीमध्ये पालिकेच्या सुरक्षानियमांना कुणीही जुमानत नसल्याचे चित्र नुकतेच पाहायला मिळाले. बाजारात झालेल्या मास्क वाटपाच्या कार्यक्रमात संबंधित घटकांनी इतकी गर्दी केली होती की बाजारात पाय ठेवायलाही जागा उरली नव्हती. अखेर हा कार्यक्रम अर्ध्यावर आटोपता घ्यावा लागला.
एपीएमसी बाजार आवारातील पाचही मार्केटमध्ये जवळपास पन्नास हजार मास्कचे वाटप करण्याचा एक उपक्रम आयोजित करण्यात आला होता. मात्र हा उपक्रम बाजाराच्या वेळेतच झाल्याने सर्वांची झुंबड उडाली. मोफत मास्क घेण्यासाठी एकच गर्दी उसळली. एपीएमसी मार्केट करोनाचा हॉटस्पॉट असल्याने येथील व्यापारी आणि कर्मचारी करोनामुक्त राहावेत या भावनेने हा उपक्रम घेण्यात आला, मात्र त्यातून मूळ उद्देशालाच हरताळ फासला गेला. ही गर्दी ज्यांनी आटोक्यात आणणे अपेक्षित होते तेच पदाधिकारी मास्क देतानाचा फोटो काढण्यात मग्न होते. त्यामुळे भाजीपाला मार्केटमध्ये या मास्क वाटप कार्यक्रमाचे तीनतेरा वाजले.
करोनाचा संसर्ग वाढू नये यासाठी परस्परांत सुरक्षित अंतर राखले जावे असे सांगितले जात असताना या कार्यक्रमात मात्र शेकडो जण एकमेकांना खेटून उभे होते. ही गर्दी आवरणे सुरक्षारक्षकांना कठीण झाले होते. एपीएमसी प्रशासनाने यात लक्ष न घातल्याने ही गर्दी हटली नाही. या गर्दीवर नियंत्रण मिळवण्यासाठी अखेरीस महापालिका आणि पोलिसांना पाचारण करण्यात आले. पालिका वाहनाने सायरन वाजवल्याने गर्दी काही प्रमाणात पांगली. तर, पोलिस आल्यानंतर जमावाला हटवून काही वेळासाठी मास्कवाटप बंद करण्यात आले.