सायबर चोरांनी ऐरोलीत राहणाऱ्या एका सेवानिवृत्त पोलिसाच्या क्रेडिट कार्डची माहिती चोरून त्यांच्या खात्यातून सुमारे एक लाख रुपयांची रोख रक्कम परस्पर काढून घेतल्याचा प्रकार उघडकीस आला. रबाळे पोलिसांनी या प्रकरणातील सायबर चोराविरोधात आयटी कायद्यानुसार गुन्हा दाखल करून या प्रकरणाच्या तपासाला सुरुवात केली आहे.
या प्रकरणात फसवणूक करण्यात आलेले ६२ वर्षीय सेवानिवृत्त पोलिस ऐरोली सेक्टर-१९ भागात राहण्यास असून ते २०१७मध्ये मुंबई पोलिस दलातून निवृत्त झाले. त्यांच्याकडे २०१९पासून आरबीएल बँकेचे क्रेडिट कार्ड आहे. ९ मार्च रोजी ते घरात झोपलेले असताना, पहाटे ३.३० वाजण्याच्या सुमारास सायबर चोराने त्यांच्या बँक खात्यातून ९९ हजार ९६० रुपये परस्पर दुसऱ्या खात्यावर वळते केले. पुन्हा २८ हजार १९० रुपयांचा दुसरा व्यवहार करण्याची तयारी सुरू केली होती. यादरम्यान, आरबीएल बँकेतून एका व्यक्तीने निवृत्त पोलिसाला संपर्क साधून त्यांच्या क्रेडिट कार्डवरून व्यवहार झाल्याची माहिती दिली. त्यानंतर त्यांनी आपले क्रेडिट कार्ड ब्लॉक केले. त्यामुळे दुसरा व्यवहार होऊ शकला नाही. त्यांनी रबाळे पोलिस ठाण्यात तक्रार दाखल केली. त्यानुसार रबाळे पोलिसांनी अज्ञात सायबर चोराविरोधात आयटी अॅक्टनुसार गुन्हा दाखल करून या प्रकरणाचा तपास सुरू केला.