सायन येथील रुग्णालयातील एका नर्सला प्रेमाच्या जाळ्यात ओढून एका भामट्याने तब्बल ४० लाख रुपयांची फसवणूक केल्याचे प्रकरण समोर आले आहे. अखेर या नर्सने अँटॉप हिल पोलिस ठाण्यात तक्रार केली आहे. विशेष म्हणजे विवाह जुळविणाऱ्या वेबसाइटवर ओळख झाल्यानंतर नागपूरचा हा तरुण नर्सच्या घरी येऊन तिच्या आई-वडिलांना भेटूनही गेल्याचे तिने तक्रारीत म्हटले आहे.
सायन कोळीवाडा परिसरात राहणाऱ्या रूपल (बदललेले नाव) हिने लग्न जुळविणाऱ्या वेबसाइटवर नोंदणी केली. तिचे प्रोफाइल पाहून ऋणाल नाव सांगणाऱ्या नागपूरच्या एका तरुणाने तिला रिक्वेस्ट पाठवली. रूपल हिने रिक्वेस्ट स्वीकारताच दोघे एकमेकांशी मोबाइलवर बोलू लागले. नयपूर येथील एका बड्या कंपनीत नोकरीला असून, घरच्यांसोबत पटत नसल्याने स्वतंत्र राहत असल्याचे ऋणाल याने सांगितले. रूपल हिने त्याच्या बोलण्यावर विश्वास ठेवला आणि तो जे काही सांगेल ते खरे मानू लागली. लघवीची समस्या असून त्यावर उपचारासाठी पैसे हवे आहेत असे सांगून त्याने रूपलकडे पैशांची मागणी केली. सुरुवातीला ५ ते १० हजार रुपये मागत असल्याने रूपलने त्याच्या बँक खात्यावर पैसे पाठविले. त्यानंतर माझा पगार थांबवला आहे, असे सांगून त्याने आणखी पैसे मागितले. जवळपास दीड लाख रुपये घेतल्यानंतर रूपल पैसे पाठविण्यास टाळाटाळ करू लागली रूपल हिला संशय येऊ नये यासाठी ऋणाल एकटा मुंबईत आला. सायन कोळीवाडा येथील तिच्या घरी कांदा-पोहे आणि ‘बघण्याचा’ कार्यक्रम पार पडला. पुढील बोलणी करण्यासाठी आई-वडिलांना घेऊन येतो असे सांगून तो पुन्हा नागपूरला गेला. नागपूरला गेल्यानंतरही त्याने वेगवेगळी कारणे सांगून पैसे मागणे सुरूच ठेवले. रुग्णालयात दाखल करण्यात आले असून, पगार नसल्याने पैशांची खूप गरज आहे, घेतलेले सर्व पैसे सरकारी नोकरी लागल्यावर देईन, असे ऋणाल सांगत असल्याने रूपल हिने आणखी पैसे पाठविले. अनेक कारणे पुढे करून ऋणाल याने रुपलकडून तब्बल ४० लाख रुपये उकळले.