पनवेल महापालिकेच्या महापौर डॉ. कविता चौतमोल यांच्या नव्या वाहनासाठी पालिकेने १५ लाख रुपये खर्च केले आहेत. महापौरांचे आधीचे वाहन, होंडा सिटी कार केवळ साडेतीन वर्षांत निकामी झाल्याने आश्चर्य व्यक्त होत आहे. ही कार अनेकदा बंद पडल्याचे कारण देत नव्या इनोव्हा क्रिस्टाची खरेदी करण्यात आली आहे.
महापालिकेच्या स्थापनेनंतर ६ महिन्यांच्या प्रशासकीय कार्यकाळानंतर निवडणूक झाली. महापालिकेची निवडणूक पार पडल्यानंतर भाजपची सत्ता आल्यामुळे महापौरपदी डॉ. कविता चौतमोल यांची नियुक्ती झाली. महापौरांना तत्कालीन धोरणाप्रमाणे वाहनासाठी १० लाख रुपये खर्चाची मुभा असल्यामुळे होंडा सिटी गाडी खरेदी करण्यात आली. चौतमोल यांना यापेक्षा महागडी कार खरेदी करण्याची इच्छा होती, मात्र तत्कालीन आयुक्त डॉ. सुधाकर शिंदे यांनी त्यांना मर्यादेपेक्षा अधिक किमतीचे वाहन खरेदी करू दिले नाही. त्यामुळे गेली ३ वर्षे त्या होंडा सिटी कार वापरत आहेत. गेल्या वर्षी ऑगस्टमध्ये महापौरांच्या वाहनखरेदीची खर्चमर्यादा १५ लाख रुपये करण्यात आली.
ही मर्यादा वाढताच प्रशासनाकडे केलेल्या मागणीनुसार महापौरांसाठी १९ लाख रुपयांची इनोव्हा क्रिस्टा ही आलिशान गाडी खरेदी करण्यात आली. महाशिवरात्रीच्या मुहूर्तावर आमदार प्रशांत ठाकूर यांच्या हस्ते या नव्या कारचे पूजन करण्यात आले. केवळ साडेतीन वर्षांपूर्वी खरेदी करण्यात आलेली महापौरांची कार एवढ्या लवकर निकामी कशी झाली. वाहनखरेदी करण्याच्या रक्कमेची मर्यादा वाढवल्यानंतर त्यांचे अपुरे स्वप्न पूर्ण केले का, असे प्रश्न या नव्या कारखरेदीच्या निमित्ताने उपस्थित झाले आहेत. याबाबत महापौरांना विचारले असता जुने वाहन अनेकदा बंद पडले म्हणून नवीन कार घेतल्याचे त्यांनी सांगितले.
जुनी कारही वापरू…
महापौरांना नवे वाहन घेतले म्हणून जुनी कार अडगळीत टाकण्यात येणार नाही. इतर कारणासाठी तिचा वापर करण्यात येईल. महापौरांची कार वारंवार बंद पडत असल्यामुळे नवी कार खरेदी करण्यात आली आहे. वाहनाचा भरपूर वापर झाल्याने ती खराब झाली असावी. शहराच्या प्रथम नागरिक म्हणून त्यांना चांगले वाहन मिळणे अपेक्षित आहे, असे पालिकेचे सहायक आयुक्त धैर्यशील जाधव यांनी सांगितले.
पालिकेच्या पैशाची उधळपट्टी
महापालिकेने खरेदी केलेले वाहन साडेतीन वर्षांत नादुरुस्त होत असेल तर संबंधित कंपनीकडे तक्रार करायला हवी. गाडी बंद पडते म्हणून नवे वाहन बदलणे हे कारण असू शकत नाही. केवळ हौस म्हणून महापालिकेच्या पैशाची उधळपट्टी केली जात आहे, अशी टीका नगरसेवक गणेश कडू यांनी केली.