जगभरात महिला दिन साजरा करून महिलांचा सन्मान आणि त्यांच्या कर्तुत्वाचे गुणगाण गायले गेले. तर दुसरीकडे त्या अजूनही सुरक्षित नसल्याचे नुकत्याच घडलेल्या घटनेवरून दिसून येत आहे. अजमेरमध्ये गुजरातच्या एका तरुणीवर सामूहिक अत्याचार करून तिला बेशुद्धावस्थेत फेकून आरोपी पसार झाल्याची घटना उघडकीस आली आहे. गस्तीवरील पोलिसांना ही तरुणी बेशुद्धावस्थेत दिसून आली. तिला तातडीने रुग्णालयात दाखल करण्यात आले. तिच्यावर उपचार सुरू आहेत.
अजमेर पोलिसांनी सांगितले की, रामगंज पोलीस ठाण्याच्या हद्दीत पोलीस कर्मचारी गस्त घालत होते. त्याचवेळी एक तरुणी बेशुद्धावस्थेत पडल्याचे त्यांना दिसले. त्यानंतर पोलिसांनी तातडीने तिला रुग्णालयात दाखल केले. तिच्यावर रुग्णालयात उपचार सुरू आहेत. अलवर गेट पोलिसांनी तिचा जबाब नोंदवून घेतला. काही तरुणांनी अज्ञात ठिकाणी नेऊन तिथे बलात्कार केला. त्यानंतर तिथेच सोडून ते पसार झाले, अशी आपबीती तिने सांगितली.
सीसीटीव्ही फुटेजची तपासणी
पोलिसांच्या माहितीनुसार, पीडित तरुणी ही गुजरातची रहिवासी आहे. सध्या तिच्यावर रुग्णालयात उपचार सुरू आहेत. पीडितेचा जबाब नोंदवण्यात आला आहे. आरोपींचा शोध सुरू करण्यात आला आहे. या प्रकरणी गुन्हा दाखल करून, तपास सुरू केला आहे. घटनास्थळावरील सीसीटीव्ही फुटेज तपासले जात आहेत.