करोना प्रतिबंधासाठीच्या लसीचे दोन्हीही डोस घेतल्यानंतर दोघे डॉक्टर पॉझिटिव्ह आल्याचे स्पष्ट झाले आहे. या दोघांचेही लाळेचे नमुने तपासणीसाठी घाटी रुग्णालयाच्या प्रयोगशाळेत पाठवले जाणार आहेत. दोघेही डॉक्टर असून, दुसरा डोस घेतल्यानंतर तीन-चार दिवसांनी त्यांना त्रास होऊ लागला. या वृत्ताला महापालिकेच्या आरोग्य वैद्यकीय अधिकारी डॉ. नीता पाडळकर यांनी दुजोरा दिला.
करोना संसर्गाचा प्रादुर्भाव रोखण्यासाठी देशपातळीवर लसीकरणाची मोहीम १६ जानेवारीपासून सुरु करण्यात आली आहे. लसीकरणाच्या पहिल्या टप्प्यात डॉक्टर्स, वैद्यकीय कर्मचारी, आरोग्य सेवकांना लस देण्यात आली. दुसऱ्या टप्प्यात फ्रंटलाइन वर्कर्सला लस देण्यात आली. तिसऱ्या टप्प्यात १ मार्चपासून ६० वर्षावरील ज्येष्ठ नागरिक व इतर आजार असलेल्या ४५ ते ५९ वयोगटातील नागरिकांना लस देण्याचे काम सुरु करण्यात आले आहे. तिसऱ्या टप्प्यातील लसीकरणाला चांगला प्रतिसाद मिळू लागला आहे. लसीचा पहिला डोस घेतल्यानंतर २८ दिवसांनी दुसरा डोस घ्यावा लागतो.
दरम्यान, लसीचे दोन्हीही डोस घेतल्यावर सुमारे पंधरा दिवसांनी शरीरात रोग प्रतिकारशक्ती निर्माण होते असे पाडळकर यांनी सांगितले. लस घेतली तरी मास्क घालणे, सुरक्षित वावर ठेवणे, सॅनिटायझरचा वापर करणे हे नियम पाळावेच लागतील असे त्यांनी स्पष्ट केले.