भाजीपाला खरेदी करण्यासाठी मंडईकडे निघालेल्या व्यक्तीला चौघांनी भरदिवसा शिवाजी रस्त्यावर चाकूच्या धाकाने लुटले. संबंधित व्यक्तीने चोरट्यांचा प्रतिकार करण्याचा प्रयत्न केला असता, आरोपींनी गळ्याला व पोटाला चाकू लावून जीवे मारण्याची धमकी दिली. या प्रकरणी फरासखाना पोलिसांनी गुन्हा दाखल करून चौघांना अटक केली.
आनंद बाळू सोनावणे (वय २२, रा. धानोरी), प्रकाश वामन शिंदे (वय ३०, रा. टाकळी मानूर, ता. पाथर्डी), नितीन हरी वेताळ (वय २२, रा. पर्वती पायथा), अर्जुन दमपा थापा (वय ३६, रा. शुक्रवार पेठ) अशी अटक केलेल्यांची नावे आहेत. याबाबत बापू सुदाम काटे (वय ४७ ,रा. नेहरूनगर, पिंपरी) यांनी तक्रार दिली.
पोलिसांनी दिलेल्या माहितीनुसार, काटे बुधवारी दुपारी चारच्या सुमारास भाजीपाला घेण्यासाठी मंडईकडे निघाले होते. शिवाजी रस्त्यावर आल्यानंतर चौघांनी काटे यांना अडवून जबरदस्तीने खिशातील अडीच हजार रुपये काढून घेतले. काटे यांनी चोरट्यांचा प्रतिकार करण्याचा प्रयत्न केला, त्या वेळी चोरट्यांपैकी एकाने त्यांच्या गळ्याला, दुसऱ्याने पोटाला, तर तिसऱ्याने पाठीला चाकू लावून जीवे ठार मारण्याची धमकी दिली. त्यानंतर चोरटे ऐवज चोरून पसार झाले. त्यानंतर काटे यांनी फरासखाना पोलिसांना घटनेची माहिती दिली. फरासखाना पोलिसांनी गुन्हा दाखल करून, चौघांना अटक केली. या प्रकरणी पोलिस तपास सुरू आहे.