एमडी पावडरची तस्करी करणाऱ्या गुजरातच्या दोन व्यक्तीसह मुंबईतील एक महिला अशा तिघांना गुन्हे शाखेने (युनिट १) अटक केली आहे. बनोबर शफिक खोटाळ (वय ३१, मुंबई), आदिल नजीरभाई शेख (वय वय २४, गुजरात), ओसामा मोहम्मद हुसेन भाभा (वय १९, गुजरात) अशी या आरोपींची नावे आहेत. न्यायालयाने तिघांनाही २२ जानेवारीपर्यंत पोलिस कोठडी दिली आहे. तिघेही आरोपी राबोडी परिसरातील सर्व्हिस रस्यावर पुलाच्या खाली एमडी पावडरची विक्री करण्यासाठी येणार असल्याची माहिती वरिष्ठ पोलिस निरीक्षक नितीन ठाकरे यांना मिळाली होती. त्यानंतर सहाय्यक पोलिस निरीक्षक योगेश काकड यांच्या पथकाने महिलेसह तिघांना ताब्यात घेतले. आणि आरोपींकडून ४ लाख ५० हजार रुपये किमतीची ९० ग्रॅम एमडी पावडर जप्त करण्यात आली. या प्रकरणी राबोडी पोलिस ठाण्यात गुन्हा दाखल करण्यात आला आहे.