सायन-पनवेल मार्गावर टेम्पो घेऊन उभ्या असलेल्या चालकाला व त्याच्यासोबत असलेल्या तरुणाला तिघा लुटारुंनी चाकूचा धाक दाखवून लुटल्याची घटना घडली आहे. या चोरट्यांनी टेम्पोचालकाचा मोबाइल फोन व रोख रक्कम लुटून पलायन केले. या तिघांविरोधात कामोठे पोलिसांनी जबरी चोरीचा गुन्हा दाखल करून त्यांचा शोध सुरू केला आहे.
तक्रारदार ज्ञानेश्वर कुंभार हा टेम्पोचालक पुणे येथे राहाण्यास असून गेल्या रविवारी त्याने आपल्या टेम्पोत केमिकल पावडर भरल्यानंतर तो पोहोचविण्यासाठी तो कामोठे येथे आला होता. यावेळी त्याच्यासोबत टेम्पो मालकाचा मुलगा विष्णू हादेखील होता. मात्र संबंधित कंपनीसमोर टेम्पो उभा करण्यासाठी जागा नसल्याने हे दोघे टेम्पोसह सायन-पनवेल मार्गावर कामोठे येथे मुंबईच्या दिशेने जाणाऱ्या मार्गिकेवर टेम्पोमध्येच थांबले होते. मध्यरात्री तेथे स्कुटीवरून आलेल्या तिघा अज्ञात लुटारूंनी या दोघांना टेम्पोतून उतरवून त्यांना धमकावण्यास सुरुवात केली.त्यातील एका लुटारुने या दोघांना चाकूचा धाक दाखवून कुंभार याच्या खिशातील फोन आणि रोख रक्कम जबरदस्तीने काढून घेऊन पलायन केले. या घटनेनंतर या दोघांनी कामोठे पोलिस ठाणे गाठून तक्रार दाखल केली.