डेक्कन क्वीन एक्स्प्रेसच्या पँट्री कारमध्ये प्रवाशाने ऑम्लेटसोबत खाण्यासाठी घेतलेल्या ‘मिरपूड’ आणि ‘सॉस’मध्ये अळ्या निघाल्याचा धक्कादायक प्रकार समोर आला आहे. या प्रकाराचा व्हिडिओ सोशल मीडियावर व्हायरल झाला असून, संबंधित प्रवाशाने नुकतीच रेल्वे प्रशासनाकडे तक्रार केली आहे.
नोकरी आणि व्यवसायाच्या निमित्ताने दैनंदिन पुणे-मुंबई ये-जा करणारे प्रवासी प्रामुख्याने ‘डेक्कन क्वीन’ने प्रवास करण्यास प्राधान्य देतात. ‘डेक्कन क्वीन’मधील ‘पँट्री कार’ ही गेल्या कित्येक वर्षांपासून प्रवाशांच्या आकर्षणाचा केंद्रबिंदू ठरली आहे. मात्र, याच प्रसिद्ध पँट्री कारमध्ये खाद्यपदार्थात अळ्या निघाल्याने प्रवाशांमध्ये त्याची चर्चा रंगली आहे. पुण्यातील व्यावसायिक सागर काळे हे खरेदीसाठी आठवड्यातून दोन वेळा मुंबईला जात असतात. १९ जुलैच्या दिवशी ते मुंबईला गेले होते. खरेदी करून पुण्याला परतत असताना, त्यांनी पँट्री कारमध्ये ऑम्लेटची ऑर्डर दिली. वेटरने ऑम्लेट आणून दिल्यानंतर काळे यांनी त्यासोबत खाण्यासाठी ‘सॉस’ आणि ‘मिरपूड’ प्लेटमध्ये घेतली. मात्र, त्यासोबत अळ्यादेखील प्लेटमध्ये पडल्या. काळे यांच्या म्हणण्यानुसार त्यांनी सहा ते सात अळ्या बाजूला काढल्या. त्यानंतर पँट्री कारच्या व्यवस्थापकाला या अळ्या दाखविण्यासाठी त्यांनी व्हिडीओ काढण्यास सुरुवात केली. त्या वेळी पँट्री कारच्या कर्मचाऱ्यांकडून त्यांना व्हिडिओ काढण्यासाठी मज्जाव करण्यात येत होता. ‘डेक्कन क्वीन’मध्ये उपस्थित असलेल्या ‘आयआरसीटीसी’च्या प्रतिनिधीच्या निदर्शनास ही बाब आणून दिली. मात्र, त्यांच्याकडूनही फारसा प्रतिसाद मिळाला नसल्याचे काळे यांनी नमूद केले. दरम्यान, कामाच्या व्यापात या प्रकाराची तक्रार देणे शक्य झाले नाही. रेल्वे प्रवासी ग्रुपच्या अध्यक्ष हर्षा शहा यांच्या सल्ल्यानुसार त्यांनी बुधवारी तक्रार दिली.