डान्स बार तसेच खुलेआम देहव्रिकय व्यवसाय चालविणाऱ्यांविरोधात मुंबई पोलिसांनी धडक मोहीम हाती घेतल्यानंतर या व्यवसायातील दलालांनी आता स्पा आणि मसाज सेंटरचा आधार घेतला आहे. मुंबईमध्ये विशेषकरून उच्चभ्रू वस्तींमध्ये स्पा आणि मसाज सेंटरचा सुळसुळाट आहे. मसाजच्या नावाखाली वेश्याव्यवसाय चालविणाऱ्या अशा सेंटरची पोलिसांनी झाडाझडती सुरू केली असून गेल्या पंधरा दिवसांत सहाहून अधिक सेक्स रॅकेटचा पर्दाफाश करण्यात आला आहे.
सोशल मीडियाचा वापर
स्पा मालक आपली जाहिरात करण्यासाठी वृत्तपत्र, वेबसाइटबरोबर सोशल मीडियाचा पुरेपूर वापर करीत आहेत. अनेक सवलती, मुलींकडून मसाजचे आमिष दाखवून ग्राहकांना आकर्षित केले जाते. त्यामुळे या सेंटरमध्ये जाणाऱ्या ग्राहकांची संख्याही कमालीची वाढली आहे.
पंधरा दिवसातील कारवाई
– अंधेरी पूर्वेकडील मोनार्च पॅलेसमधील झास्टा स्पा या ठिकाणी युनिट ८ चे वरिष्ठ पोलिस निरीक्षक पोखरकर यांच्या पथकाने छापा टाकला. पाच मुलींची सुटका करून दोघांना अटक केली.
– मसाज आणि स्पा ची जाहिरात देऊन सेक्स रॅकेट चालविणाऱ्यांचा वरिष्ठ पोलिस निरीक्षक सतीश तावरे यांच्या पथकाकडून पर्दाफाश. हॉटेल मॅनेजरला अटक आणि तीन तरुणीची सुटका.
– विलेपार्ले येथील दी थाई व्हिला, ऑथेंटिक स्पा येथून सहा मुलींची पोलिस निरीक्षक आशा कोरके यांच्या पथकाने सुटका केली. स्पा मालक आणि मॅनेजर यांच्यावर कारवाई
– व्हॉट्सअपवरून ग्राहकांना तरुणीचे फोटो पाठवून त्याआधारे वेश्याव्यवसाय चालविणाऱ्या चारकोप येथील महिलेला अटक. युनिट ११ च्या पथकाने या कारवाईत तीन तरुणींची सुटका केली.
– गोरेगाव पूर्व येथील आर्य स्पा सेंटरवर विशेष पथकाने छापा टाकून तब्बल आठ मुलींची सुटका केली. मालक, मॅनेजर, कर्मचारी यांच्यावर अटकेची कारवाई.
– पेनिन्सुला ग्रँड हॉटेलमध्ये कॉलसेंटरच्या नावाखाली वेश्याव्यवसाय चालविणाऱ्यांवर युनिट ९ चे वरिष्ठ पोलिस निरीक्षक महेश देसाई यांच्या पथकाची कारवाई.