जम्मू-काश्मीरमधून कलम ३७० हटवल्यानंतर तीळपापड झालेल्या पाकिस्तानकडून वारंवार शस्त्रसंधीचं उल्लंघन केले जात आहे. जम्मू-काश्मीरच्या राजौरी जिल्ह्यात नियंत्रण रेषेवर आज पुन्हा पाकिस्तानी सैन्यानं बेछूट गोळीबार केला. भारतीय जवानांनीही त्यांना चोख प्रत्युत्तर दिले. या चकमकीत एक भारतीय जवान शहीद झाला, तर अन्य चार जण जखमी झाले आहेत.
पाकिस्तानी सैन्यानं सोमवारी सकाळी ११ वाजता नियंत्रण रेषेजवळील कृष्णा घाटी सेक्टरमध्ये तुफान गोळीबार केला. पाकिस्तानी सैन्यानं भारतीय जवानांच्या चौक्यांना लक्ष्य केलं. भारतीय जवानांनीही त्यांना जोरदार प्रत्युत्तर दिले. या चकमकीत भारतीय लष्कराचा एक जवान शहीद झाला. तर चार जखमी झाले आहेत. त्यांना स्थानिक रुग्णालयात दाखल करण्यात आलं आहे. नियंत्रण रेषेला लागून असलेल्या परिसरांतही पाकिस्तानकडून उखळी तोफांचा मारा करण्यात आला. नियंत्रण रेषेवरील तणावाच्या पार्श्वभूमीवर लष्करानं तेथील नागरिकांना सतर्क राहण्याचं आवाहन केलं आहे.