बकरी ईदच्या दिवशी निवासी फ्लॅट आणि घरांमध्ये बकरे किंवा मेंढ्या कापण्यास परवानगी देण्याच्या निर्णयाला मुंबई उच्च न्यायालयाने स्थगिती दिली आहे. तसेच निवासी परिसर किंवा सोसायटीच्या भूखंडावर बकरी ईदच्या दिवशी बकरे किंवा मेंढ्या कापण्यास पूर्णपणे बंदी घालता येणार नसल्याचंही कोर्टानं स्पष्ट केलं आहे.
मुंबई उच्च न्यायालयाचे न्यायामूर्ती एस. सी. धर्माधिकारी आणि न्यायामूर्ती जी. एस. पटेल यांनी ही स्थगिती दिली आहे. धार्मिक स्थळं आणि समाज केंद्राच्या एक किलोमीटर परिसरातील सोसायट्यांना सोसायटी परिसरात बकरे कापण्याऐवजी समाज केंद्रात बकरे किंवा मेंढ्या कापू शकता, असे निर्देश मुंबई महापालिका या सोसायट्यांना देऊ शकते, असं कोर्टानं म्हटलं आहे. तसेच बकरे कापण्यात येणाऱ्या परिसरात स्वच्छता ठेवण्याचे निर्देशही कोर्टाने दिले आहेत.
फ्लॅटमध्ये बकरे कापण्याची परवानगी दिली तर तिथे स्वच्छता राखणं अशक्य होईल. त्यामुळे खासगी निवासी परिसरात बकरे कापण्यास परवानगी देता येणार नाही, असंही कोर्टाने दोन याचिकांवर निर्णय देताना स्पष्ट केलं आहे.