आपल्या वादग्रस्त विधानांमुळे नेहमी चर्चेत राहणारे भाजप आमदार विक्रम सैनी पुन्हा एकदा बरळले आहेत. काश्मीरमधील कलम ३७० रद्द करण्याच्या केंद्राच्या निर्णयाचे स्वागत करताना सैनी यांनी वादग्रस्त विधान केले. ते म्हणाले, ‘देशातील मुस्लिमांनी खुश व्हायला हवे. ते आता न घाबरता गोऱ्या काश्मिरी मुलींशी लग्न करू शकतात. इतकंच नाही तर भाजपचे अविवाहित नेतेही आता काश्मीरला जमीन खरेदी करू शकतात आणि लग्न करू शकतात.’
केंद्र सरकारने जम्मू-काश्मीरचं विभाजन करून जम्मू-काश्मीर आणि लडाख असे दोन केंद्रशासित प्रदेश निर्माण करण्याचा निर्णय घेतला. या निर्णयाचं स्वागत करताना सैनींनी वरील वादग्रस्त विधान केलं. मुझफ्फरनगरमध्ये आयोजित एका कार्यक्रमात ते बोलत होते. ‘भाजपमध्ये जेवढे अविवाहित नेते आहेत. ते सर्व आता काश्मीरला जाऊन लग्न करू शकतात. आम्हाला काही आक्षेप नाही. इतकंच नव्हे तर भाजपच्या मुस्लिम कार्यकर्त्यांनीदेखील खुश व्हायला हवं कारण ते आता गोऱ्या काश्मीरी मुलींशी लग्न करू शकतील,’ असं सैनी म्हणाले.
काश्मीरला लागू असलेले कलम ३७० रद्द केल्याच्या निर्णयाच्या स्वागतासाठी कठौली येथे शेकडो भाजप कार्यकर्ते एकत्र जमले होते. या कार्यक्रमाला सैनी प्रमुख पाहुणे म्हणून उपस्थित होते होते.