पनवेल शनिवारी खारघरमधील गोल्फ कोर्स व्हॅलीजवळील धबधब्याच्या ओढ्यात वाहून गेलेल्या चार तरुणींपैकी बेपत्ता एका तरुणीचा अखेर शोध लागला आहे. ओढ्यातील पाण्यातून वाहत जाऊन हा मृतदेह बेलापूर येथील खाडीत आढळला. खाडीतील मच्छिमार बांधवांना सोमवारी दुपारी हा मृतदेह सापडला. वर्षासहलीसाठी कॉलेजला दांडी मारून खारघरच्या पांडवकड्याजवळ असलेल्या धबधब्यात आनंद लुटण्यासाठी आलेल्या चार तरुणी शनिवारी सकाळी नऊच्या सुमारास ओढ्याच्या पाण्यात वाहून गेल्या होत्या. नेरूळ येथील एसआयईएस कॉलेजात कॉमर्सच्या द्वितीय वर्षात शिकणारे सात विद्यार्थी कॉलेजला दांडी मारून वर्षासहलीसाठी खारघरला आले होते. गोल्फ कोर्स व्हॅलीच्या बाजूने जाऊन एका धबधब्याच्या ओढ्यात पाण्याचा अंदाज न आल्यामुळे चार तरुणी वाहून गेल्या. यामध्ये एका वर्गात शिकणाऱ्या तीन मैत्रिणींचा समावेश होता. तर, नेहा जैन ही तरुणी चेंबूर येथून मित्रासोबत आली होती. सर्वप्रथम तिचा मृतदेह हाती लागला होता. तीन मैत्रिणींपैकी आरती नायक, श्वेता नंद यांचा दोघींचा मृतदेह गोल्फ कोर्सच्या आवारातच हाती लागला. बराच शोध घेऊन चौथी तरुणी नेहा दामा हिचा शोध मात्र लागला नव्हता. रविवारी ड्रोनच्या सहाय्याने, ओढ्यात जाळे लावूनही मृतदेह हाती न लागल्यामुळे पोलिसांनी शनिवारी रात्रभर मुसळधार पडलेल्या पावसामुळे मृतदेह खाडीत वाहून गेला असावा, अशी शक्यता वर्तविली होती. अखेर बेलापूर येथील खाडीकिनारी आलेला मृतदेह मच्छिमारांना दिसला. सोमवारी दुपारी १२च्या सुमारास मच्छिमारांनी तातडीने एनआरआय पोलिसांना ही माहिती दिल्यानंतर मृतदेह बाहेर काढण्यात आला.