गंगापूर रोडवरील मराठा विद्या प्रसारक संस्थेच्या मराठा हायस्कूलमध्ये अंगावर कपाट पडून विद्यार्थ्याचा मृत्यू ओढावल्याची दुर्दैवी घटना घडली. जयेश सखाराम अवतार (१२) असे मृत विद्यार्थ्याचे नाव आहे.
जयेश अवतार सातवीत शिक्षण घेत होता. दुपारी तीन वाजेच्या सुमारास बाहेर पाऊस सुरू असल्याने विद्यार्थी वर्गातील कपाटाभोवती खेळत होते. या वेळी जयेशच्या अंगावर गोदरेजचे लोखंडी कपाट पडले. मोठा आवाज झाल्याने विद्यार्थी घाबरून सैरावैरा पळू लागले. शिक्षकांनीही त्वरित धाव घेत विद्यार्थ्याला उपचारांसाठी दवाखान्यात दाखल केले. पण त्याचे प्राण वाचू शकले नाहीत. सरकारवाडा पोलिस ठाण्यात आकस्मात मृत्यूची नोंद करण्यात आल्याची माहिती वरिष्ठ पोलिस निरीक्षक सुनील रोहकले यांनी दिली. जयेश हा पंचवटी परिसरातील मखमलाबाद रोडवरील क्रांतिनगर येथील वैभवलक्ष्मी अपार्टमेंटमधील रहिवासी आहे. शाळेच्या हलगर्जीपणामुळे या दुर्दैवी प्रसंगाला सामोरे जावे लागल्याचा आरोप जयेशच्या कुटुंबीयांनी केला. वर्गखोलीत कपाटासारख्या अवजड वस्तू शालेय प्रशासनाने ठेवल्याच कशा, असा सवालही जयेशचे पालक आणि संतप्त नागरिकांनी उपस्थित केला आहे.
जयेशच्या वडिलांचे मेनरोड परिसरात ऑप्टिकलचे दुकान असून, त्यांना गिरीश आणि जयेश अशी दोन मुले होती. गिरीश हा बिटको महाविद्यालयात शिक्षण घेतो आहे, तर जयेशने पाचवीपर्यंत रमाबाई आंबेडकर शाळेत शिक्षण घेतल्यानंतर सहावीला मराठा हायस्कूलमध्ये प्रवेश घेतला होता. यंदाच्या शैक्षणिक वर्षात मविप्रच्या शाळांचा गणवेश बदलल्याने दोनच दिवसांपूर्वी जयेशसाठी पालकांनी नवीन गणवेश खरेदी केला होता. हा गणवेश घालून शाळेत जाण्याचा जयेशचा मंगळवारी पहिलाच दिवस होता. मात्र, नव्या गणवेशाचा हा दिवस अखेरचाच ठरला. शाळेतही हुशार म्हणून जयेश परिचित होता.