पत्नीशी भांडण झाल्यामुळे रागाच्या भरात पतीने तिचे खाजगी फोटो फेसबुकवर टाकल्याची धक्कादायक घटना हैदराबाद येथे घडली आहे. याप्रकरणी आरोपी पतीला अटक करण्यात आली असून पुढील तपास सुरु आहे. याआधीही या महिलेने पतीविरोधात हुंड्यासाठी छळ केल्याची तक्रार दाखल केली होती.पोलिसांनी दिलेल्या माहितीनुसार पीडित महिला आणि आरोपीची भेट हैदराबादमधील एका रुग्णालयात झाली होती. तेव्हा पीडित महिला तिथे स्टाफ नर्स होती. भेटीचं रुपांतर प्रेमात झालं आणि काही काळाने या दोघांनी एका स्थानिक मंदिरात लग्न केलं. पण लग्नानंतर काही दिवसांनी या महिलेने पतीचा मोबाइल तपासला. तो इतर अनेक महिलांच्या संपर्कात असल्याचं महिलेच्या लक्षात आलं. तेव्हापासून दोघांमध्ये वारंवार खटके उडत होते. या तंट्यांमुळे अखेर तिच्या पतीने त्याची नोकरी सोडली आणि त्याच्या महेश्वरम गावी तो परत गेला. गावी परत गेल्यावर एक फेक अकाउंट उघडले. तसंच आक्षेपार्ह मजकूरासह त्याने आपल्या पत्नीचे खाजगी फोटो फेसबुकवर पोस्ट केले.
हा प्रकार लक्षात येताच तिने लगेच जवळच्या पोलीस ठाण्यात तक्रार दाखल केली. पोलिसांनी आता तिच्या पतीला अटक केली असून पुढील तपास सुरु आहे. तसंच आरोपीने हुंड्यासाठी छळल्याचा आरोप महिलेने केला आहे. त्या प्रकरणाचाही तपास पोलीस करत आहेत.