भाजप आमदार कुलदीप सिंह सेंगर याच्यावर बलात्काराचा आरोप करणाऱ्या उन्नाव येथील पीडित मुलीचा समावेश असलेल्या एका कारला रायबरेली येथील गुरबख्श गंज भागात रविवारी एका ट्रकने धडक दिली. या अपघातात मुलगी जबर जखमी झाली असून, तिची काकी पुष्पा आणि मावशी शीला यांचा मृत्यू झाला आहे. कारमधील एक वकीलही जबर जखमी असून, अपघातानंतर ट्रकचालक पळून गेला आहे.
भरधाव वेगात असलेला ट्रक पावसामुळे निसरड्या झालेल्या रस्त्यावरून घसरला आणि त्याने समोरून येणाऱ्या कारला धडक दिली. तिन्ही जखमींना लखनऊच्या ट्रॉमा सेंटरमध्ये दाखल करण्यात आले आहे, अशी माहिती रायबरेली पोलिसांनी दिली. या अपघाताची माहिती मिळताच उन्नावच्या पोलिस अधीक्षक माधव प्रसाद वर्मा यांनी माखी येथील ठाण्याच्या पोलिस निरीक्षकांना पीडित मुलीचा भाऊ आणि तीन बहिणींना लखनऊ ट्रॉमा केअर येथे घेऊन जाण्याचे आदेश दिले आहेत.
सन २०१७मध्ये या मुलीने सेंगरवर बलात्काराचा आरोप केला होता. या प्रकरणी सेंगरला अटकही झाली होती. या मुलीने मुख्यमंत्री योगी आदित्यनाथ यांच्या सरकारी निवासस्थानाबाहेर आत्मदहनाचा प्रयत्न केल्यानंतर हे प्रकरण उजेडात आले होते.