गेल्या दोन दिवसांपासून कोसळणाऱ्या मुसळधार पावसाने तिसऱ्या दिवशीही दमदार हजेरी लावली असून त्यामुळे ठाणे शहरात वृक्ष पडझडीच्या घटना घडल्याचे समोर आले आहे. ठाण्यात शुक्रवारी दिवसभरात ४४.९५ मिमी पावसाची नोंद झाली असून वृक्षपडझडीच्या आठ घटना समोर आल्या आहेत. तर, नौपाडा परिसरात एक विद्युत खांब कोसळल्याची घटना घडली. गडकरी रंगायतन परिसरातील आम्रपाली हॉटेल परिसरात पाणी साचले होते. तर, घंटाळीतील गौतमदीप सोसायटी येथेदेखील पाणी साचले होते.
ठाणे शहरामध्ये तिसऱ्या दिवशीही सुरू असलेल्या पावसामुळे वागळे इस्टेट परिसरात एक जुने अवाढव्य झाड एका घरावर कोसळल्याचे घटना शुक्रवारी दुपारी घडली. यामध्ये घराचे नुकसान झाले असून छप्पर आणि भिंत कोसळली आहे. वागळे इस्टेट येथील शिवसेना शाखा रस्ता क्रमांक २८ येथील कैलास नगर परिसरातील ढगाले चाळीमध्ये ही घटना घडली. हिरावती इंद्रजीत पाल यांच्या मालकीचे हे घर होते. आपत्ती व्यवस्थापन विभागाच्या पथकाने घटनास्थळी पोहोचून हे झाड हटवले. तर, राम मारुती रोडवरील गजानन महाराज मंदिरासमोरील सायकल स्टॅण्डलगत एका विद्युत खांब रस्त्यावर कोसळल्याची घटना घडली. त्यानंतर आपत्कालीन पथकाने घटनास्थळी पोहोचून हा खांबही दूर केला. शहरामध्ये पावसाचा जोर वाढण्याची शक्यता असून त्यानुसार हवामान खात्याकडून सतर्कतेचा इशारा देण्यात आला आहे.