डोंगरीत इमारत कोसळून १३ ठार

डोंगरी येथील तांडेल स्ट्रीटवरील केसरबाई इमारत कोसळून अक्षरशः जमीनदोस्त झाली. या दुर्घटनेत आतापर्यंत १३ जणांचा मृत्यू झाला असून, नऊ जण जखमी झाले आहेत.

सरकारकडून दुर्घटनेतील मृतांच्या कुटुंबीयांना पाच लाख रुपये, तर जखमींना ५० हजार रुपयांची आर्थिक मदत, तसेच सर्व वैद्यकीय खर्च देण्यात येणार असल्याची माहिती मुख्यमंत्री देवेंद्र फडणवीस यांनी दिली.

‘केसरबाई-१’ या चारमजली अधिकृत इमारतीमागे ‘केसरबाई-२’ ही अनधिकृत इमारत उभारण्यात आली होती. ‘केसरबाई-२’मध्ये चार ते पाच कुटुंब आणि काही व्यावसायिक गाळे होते. सोमवारी सकाळी साडेअकरा वाजता इमारत हलल्यासारखी वाटली आणि क्षणार्धात तीन मजले कोसळले. इमारतीजवळच्या बेकरीतील काहीजणांनी सर्वप्रथम घटनास्थळी धाव घेऊन बचावकार्यास सुरुवात केली. त्यानंतर पोलिस, अग्निशमन जवान आणि ‘एनडीआरएफ’च्या पथकांनी मदतकार्य सुरू केले. रात्रीपर्यंत ढिगाऱ्याखालून अनेकांना बाहेर काढण्यात आले. त्यापैकी १३ जणांचा मृत्यू झाला होता.