हिमाचल प्रदेशातील सोलन जिल्ह्यातील कुमारहट्टीमध्ये रविवारी दुपारी इमारत कोसळली. इमारतीच्या ढिगाऱ्याखाली अनेक जण अडकल्याची भीती आहे. या दुर्घटनेत सहा जवानांसह सात जणांचा मृत्यू झाला. पंचकुला येथून एनडीआरएफचे पथक बोलावण्यात आले आहे. मुसळधार पावसामुळं बचावकार्यात अडथळा निर्माण होत आहे.
मिळालेल्या माहितीनुसार, लष्कराचे जवान या इमारतीत असलेल्या ढाब्यावर जेवणासाठी थांबले होते. त्याचवेळी इमारत कोसळली. जवानांसोबत त्यांच्या कुटुंबातील सदस्यही होते. सोलनचे उपायुक्त के. सी. चमन यांनी सांगितले की, ‘लष्कराच्या १७ जवानांसह ११ नागरिकांना बाहेर काढण्यात आले आहे. सहा जवान आणि एका नागरिकाचा मृत्यू झाला आहे. तर सात जवान अजूनही ढिगाऱ्याखाली अडकल्याची शक्यता आहे. सोमवारी दुपारपर्यंत बचावकार्य पूर्ण होईल.’