हेडफोन घालून जनावरे चारणाऱ्या तरुणााचा पाठीमागून आलेल्या रेल्वेच्या धक्क्यात जागीच मृत्यू झाला. रविवारी दुपारी साडेचार वाजता हा अपघात मयूरबन कॉलनीजवळील रेल्वे रुळावर झाला. शेख नाबीद शेख नूर पाशा (वय २२, रा. राजनगर, मयूरबन कॉलनी) असे या तरुणाचे नाव आहे. शेख नाबीद याच्याकडे जनावरे असून, राजनगर भागात त्याचा गोठा आहे. रविवारी दुपारी नाबीद म्हशी चारण्यासाठी घेऊन गेला होता. यावेळी म्हशी चरत असताना नाबीद हा मोबाइलवर हेडफोन लावून गाणी ऐकत होता. गाणी ऐकता ऐकता तो रेल्वे रुळावर आला. यावेळी नेमकी पाठीमागून रेल्वे आली. हेडफोनमुळे नाबीदला रेल्वेचा आवाज एकू आला नाही. रेल्वेची धडक बसल्यामुळे त्याच्या डोक्याला, चेहऱ्याला आणि छातीला मार लागला. त्याचा मित्र योगेश वाघमारे याने त्याला रुग्णालयामध्ये दाखल केले. मात्र उपचारादरम्यान नाबीदचा मृत्यू झाला. जवाहरनगर पोलिस ठाण्यात या प्रकरणी अकस्मात मृत्यूची नोंद करण्यात आली, असून जमादार दाभाडे तपास करीत आहेत