बंगाली चित्रपटातली प्रसिद्ध अभिनेत्री आणि तृणमूल काँग्रेसच्या खासदार नुसरत जहाँ यांचे पती निखिल जैन यांना मोबाइलचा व्हीआयपी नंबर देण्याच्या नावाखाली ४५ हजारांचा गंडा घालण्यात आल्याची बाब उघडकीस आली आहे. व्हीआयपी मोबाइल नंबर मिळवून देण्याच्या नावाने ठकवणूक करणाऱ्या या टोळीने केवळ निखिल जैन यांनाच नव्हे तर अनेकांना अशाच प्रकारचा गंडा घातल्याची धक्कादायक बाब उघडकीस आली असून याप्रकरणी अज्ञातांविरुद्ध गुन्हा दाखल करण्यात आला आहे.
काही लोकांनी कोलकात्यातील अनेक लोकांना मेसेज पाठवून व्हीआयपी मोबाइल नंबर देण्याची ऑफर दिली होती. ई-मेलद्वारे हे मेसेज पाठवण्यात आले होते. तसेच या व्हीआयपीनंबरसाठी बँक खात्यात ४५ हजार रुपये जमा करण्यासही आरोपींनी सांगितलं होतं. त्यानुसार जैन यांनी बँक खात्यात पैसेही जमा केले. मात्र अनेक दिवस उलटूनही त्यांना व्हीआयपी नंबर मिळाला नाही. त्याच दरम्यान दिल्ली पोलिसांच्या एका टीमने ४ वर्षापूर्वी घडलेल्या व्हीआयपी नंबर देण्याच्या प्रकरणाचा तपास केल्यानंतर जैन यांच्यासह अनेकांना आपलीही फसवणूक झाल्याचं लक्षात आल्यावर त्यांनी कोलकाता पोलीस ठाण्यात गुन्हा दाखल केला. कोलकाता पोलिसांच्या सायबर सेलने गुन्हा दाखल करून घेतला असून याप्रकरणी अद्याप कुणालाही अटक करण्यात आलेली नाही. जैन हे रंगोली साडीच्या ब्रँडचे मालक आहेत. नुसरत आणि त्यांचा तुर्कीत नुकताच विवाह संपन्न झाला. विवाहाच्या प्रित्यर्थ आयोजित रिसेप्शन पार्टीच्या एक दिवस आधी त्यांनी ही तक्रार दाखल केली आहे.