टीव्ही मालिकांमध्ये बालकलाकार म्हणून काम करणाऱ्या पंधरा वर्षाच्या मुलीची गेल्या सात दिवसांपासून मृत्यूशी सुरू असलेली झुंज अखेर अपयशी ठरली. शुक्रवारी दुपारी हिरानंदानी रुग्णालयात तिचा मृत्यू झाला. या मुलीला तिच्या प्रियकराने आठव्या मजल्यावरून ढकलले होते. आरे कॉलनीमध्ये राहणाऱ्या पंधरा वर्षांच्या मुलीवर याच परिसरात राहणाऱ्या अल्पवयीन मुलाचे प्रेम होते. मात्र ही मुलगी त्याला प्रतिसाद देत नव्हती. तरीही या मुलाने तिचा पाठलाग सोडला नाही. शाळेत जाताना, घराबाहेर एकटी दिसली की तो काही ना काही कारण काढून तिच्याशी बोलण्याचा प्रयत्न करायचा. २९ जून रोजी या मुलाने तिला भेटण्यासाठी बोलाविले. त्यामुळे ती पाणीपुरी खायला जाते, असे सांगून घराबाहेर पडली आणि या मुलाला भेटायला गेली. काही वेळाने मुलगी खाली पडून जखमी झाल्याचे तिच्या पालकांना समजले. तिने आत्महत्या करण्याचा प्रयत्न केला अशी शक्यता व्यक्त करण्यात येत होती. पालकांनी पोलिसांच्या मदतीने मुलीला उपचारासाठी हिरानंदानी रुग्णालयात दाखल केले.
हिरानंदानी रुग्णालयात अतिदक्षता विभागात तिच्यावर उपचार सुरू होते. मेंदूला मर लागल्याने तिच्यावर तीन शस्त्रक्रिया करण्यात आल्या. बुधवारी रात्रीपासून तिच्या प्रकृतीत सुधारणा होत होती, मात्र शुक्रवारी दुपारी तिचा मृत्यू झाल्याचे पोलिसांनी सांगितले. तिच्या आई-वडिलांनी या मुलावर संशय व्यक्त केला होता. दरम्यान तपासामध्ये या मुलानेच तिला ढकलल्याचे स्पष्ट झाले आहे. आरे पोलिसांनी त्या मुलाला आणि त्याला पाठीशी घालणाऱ्या त्याच्या आई-वडिलांना अटक केली. पोलिसांनी या मुलीचा मृतदेह जे. जे. रुग्णालयात शवविच्छेदनासाठी पाठवला. या अहवालानंतर पुढील तपास केला जाईल, असे पोलिसांनी म्हटले आहे.