ठाणे स्थानकातून शेअर रिक्षाने गोखले रोडवरून रघुनाथ नगरकडे जात असलेल्या ४४ वर्षीय व्यक्तीच्या हातातील १५ हजारांचा मोबाइल पिवळ्या रंगाच्या मोटरसायकलवरून येणाऱ्या चालकाने लंपास केला. याच मोटारसायकलस्वाराने कॅडबरी पुलाखाली उभ्या २९ वर्षीय तरुणाचा मोबाइल चोरल्याचेही समोर आले आहे. या प्रकरणी गुन्हा दाखल झाला असला तरी अद्याप आरोपीला शोध लागलेला नाही.
रघुनाथनगर येथे राहणारे हितेश गुरुवारी रात्री ११ वाजण्याच्या सुमारास ठाणे स्थानकाजवळून शेअर रिक्षातून प्रवास करत होते. गोखले रोडवरील मोबाइल स्टुडिओ दुकानाच्या समोरून गाडी जात असातना पाठीमागून दुचाकीस्वाराने हितेश यांच्या हातातील मोबाइल खेचून पळ काढला. या प्रकरणी तक्रार करण्यासाठी नौपाडा पोलिस ठाण्यात हितेश पोहोचले असता, कॅडबरी पुलाखाली उभ्या असलेल्या रूपेश या तरुणाचा फोनही या व्यक्तीने खेल्याचे समोर आले.