धावत्या लोकलमध्ये बाटली फेकून मारल्यामुळे एक महिला जखमी झाली आहे. आशा विनोद पाटील असे या महिलेचे नाव आहे. या दुर्घटनेत महिलेच्या हाताला आणि डोक्याला मार लागला असून हाताला आठ टाके पडले आहेत. या दुर्घटनेला ठाणे रेल्वे पोलिसांनी दुजोरा दिला आहे. डोंबिवली , देसले पाडा येथे राहणाऱ्या आशा यांनी शुक्रवारी रात्री नऊ वाजण्याच्या सुमारास ठाणे स्थानकातून डोंबिवली जाणारी लोकल पकडली. ‘लोकलमध्ये गर्दी असल्याने मी आणि अन्य महिला प्रवासी दरवाज्याच्या आतील बाजूस उभे होतो. लोकल ठाणे आणि कळवा खाडी पुलाजवळ पोहचताच अचानक रिकामी दारूची बाटली हातावर आदळली. या दुर्घटनेत हाताला आणि डोक्याला दुखापत झाल्याचे आशा पाटील यांनी सांगितले.
या दुर्घटनेची माहिती कळवा रेल्वे सुरक्षा दलाला देण्यात आली. दरम्यान उपचारासाठी कळवा रुग्णालयात गेले असता सुरुवातीला त्यांनी जे जे रुग्णलयात जाण्यास सांगितले. मात्र काही वेळानंतर पैसे घेऊन उपचार करण्यासाठी त्यांनी तयारी दर्शवल्याची माहिती आशा यांचे पती विनोद पाटील यांनी दिली.
ठाणे आणि कळवा स्थानकादरम्यान महिला डब्यावर बाटली फेकल्याची घटना शुक्रवारी रात्रीच्या सुमारास घडली. जखमी महिलेला कळवा रुग्णालयात उपचारासाठी दाखल करण्यात आले. मात्र रेल्वे पोलिसांकडे याबाबत अद्याप कोणतीही तक्रार दाखल करण्यात आली नसल्याची माहिती ठाणे रेल्वे पोलिसांनी दिली.